भांगरभूंय | प्रतिनिधी
पणजीः म्हापशेंच्या बार्देस कोंकणी अस्मिताय केंद्रान अंदूं आपलो रुप्या महोत्सव मनयलो. ते निमतान 31 जुलयाक केरी सत्तरीच्या विवेकानंद विद्यालयाच्या सभाघरांत, ‘श्रावणी काव्योत्सव’ दबाज्यान मनयलो. ह्या वेळार विद्यालयाचे मुख्याध्यापक गोपिनाथ गांवस हांणी केंद्राच्या वांगड्यांक थळाव्या सातींगण प्रेरणा रुखा खाला परंपरीक दिवज पेटोवन येवकार दितना गोंयच्या संस्कृतीक दायजाचें दर्शन घडयलें.
केंद्राची अध्यक्ष अपर्णा गारुडी हांणी प्रास्तावीक केलें. संयोजिका चंद्रिका पाडगांवकार हांणी येवकार दिलो. मानेस्तांचे हस्तुकीं स्वामी विवेकानंदाच्या फोटवाक फुलां हार घालून तशेंच दिवली पेटोवन श्रावणी काव्योत्सवाची सुरवात जाली.
काव्योत्सवाक मुखेल सोयरे म्हूण गोपिनाथ गांवस आनी मानाचे सोयरे म्हूण ठाणे सत्तरीचे सरकारी माध्यमीक शाळेचे मुख्याध्यापक काशिनाथ नायक हाजीर आशिल्ले. ह्या वेळार केंद्राचे जेश्ठ वांगडी प्राचार्य सुभाष नायक हांणी केंद्राच्या शिक्षणीक आनी सामाजीक वावराची म्हायती दिली.
काव्योत्सवांत काशिनाथ नायक, गोपीनाथ गांवस, अपर्णा गारुडी, चंद्रिका पाडगांवकार, काश्मिरी पावसकार, महादेव गांवकार, गोविंद मोपकार, पल्लवी गोलतकार, सनत भरणे, हरीश कामत, भगवान म्हामल, नयना नाडकर्णी, उर्वशी प्रभू, मेघना गांवस, ग्रिश्मा गांवस, प्रिती फुलारी, प्रविणा थळी, अनघा कामत, अरुणा पाटणेकार, लाडको कुडतरकार, प्रणिता रेडकार, सुभाष नायक आनी वामन धारवाडकर हांणी कविता सादर केल्यो. कविता सादर करपी दरेकल्याक केंद्रा वतीन प्रमाणपत्रां भेटयलीं. केंद्राची सचीव प्रविणा थळी हांणी उपकार मानले. कार्यावळीचें संयोजन चंद्रिका पाडगांवकार, पल्लवी गोलतकार आनी विभा पार्सेकार हांणी केल्लें. जेवणा उपरांत दुसऱ्या सत्रांत ह्या वाठारांत झाडांचे रोंपे रोयले. कार्यावळीचीं सुत्रां पल्लवी गोलतकार, गोविंद मोपकार आनी प्रणिता रेडकार हांणी सांबाळ्ळीं. परतून घरां येतना सगळ्या वांगड्यांनी हरवळें घसघशाचें दर्शन घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
