बार्देसांत स उमेदवार बिनविरोध जैतिवंत

भांगरभूंय | प्रतिनिधी

पांच अर्ज भायरायले; वट्ट 1142 अर्ज ग्राह्य; फाल्यां आंकडो जातलो स्पश्ट

म्हापशें: बार्देस म्हालांतले पंचायत वेंचणुकेंत स उमेदवारांची बिनविरोध निवड जाली. जाल्यार पांच उमेदवारी अर्ज भायरायले. छाननी वेळार वट्ट 1142 अर्ज ग्राह्य धरले. फाल्यां (बुधवारा) अर्ज फाटीं घेवपाचो दीस आशिल्ल्यान 33 पंचातींतल्या 279 प्रभागांतल्या उमेदवारांचो आंकडो स्पश्ट जातलो.

नादोडें पंचायतींतल्यान तीन, साल्वादोर दी मुंद दोन आनी रेईश मागूसांतल्यान एकल्याची बिनविरोध निवड आतां निश्चीत जाली. नादोडें पंचायत प्रभाग चारांतल्यान आदली सरपंच मधुरा मांद्रेंकार, प्रभाग तिनांतल्यान परेश गांवस आनी प्रभाग पांचांतल्यान रामा उर्फ दीपक नादोडकार हांची बिनविरोध निवड जाल्या.

साल्वादोर-दी-मुंद पंचायतीच्या प्रभाग दोनांतल्यान संदीप साळगांवकार जाल्यार प्रभाग तिनांतल्यान रीना फर्नांडीस ह्या आदले सरपंच आनी उपसरपंचाची बिनविरोध निवड जाल्या. सेगीत दुसरे फावटी वयले दोगूय बिनविरोध जैतिवंत थारले.

मजगतीं, कळंगूट पंचायतीच्या प्रभाग सातांतल्यान फ्रान्सीस रॉड्रिगीश आनी एडेलिना रॉड्रिगीश हांच्या उमेदवारी अर्जाचेर आक्षेप घेतलो. जोसेफ सिक्वेरा हांणी ही हरकत घेतिल्ली. पूण सुनावणे उपरांत ही हरकत भायरावन दोगांचेय उमेदवारी अर्ज ग्राह्य धरले.

हणजूण-कायसूव पंचायत प्रभाग सातांतल्यान पेद्रो मेंडोसा आनी रवी हरमलकार हांच्या उमेदवारीचेर आक्षेप घेतलो. वेंचणूक अधिकाऱ्यांनी सुनावणी घेवन ह्या दोगांची उमेदवारी ग्राह्य धरली. रमेश नायक हांणी ही हरकत घेतिल्ली.

उमेदवारी अर्जांचे छानने वेळार वेंचणूक अधिकाऱ्यांनी वट्ट पांच अर्ज न्हयकारले. तातूंतले चार अर्ज ओबीसी परवान्या खातीर जाल्यार साल्वादोर द मुंद हांगा अनुमोदकान हरकत घेतली. हातूंत कांदोळी पंचायत प्रभाग सातांतल्यान मारिया ज्योकीम परेरा, साल्वादोर-दी-मुंद प्रभाग दोनांतल्यान रोशनी सावयकार, शिवोली-सडयें प्रभाग एकांतल्यान लाविनो फर्नांडीस, हणजूण-कायसूव प्रभाग दोनांतल्यान पार्वती नागवेंकार आनी हडफडें-नागवा प्रभाग दोनांतल्यान ज्युआस फर्नांडीस हांचे अर्ज अवैध थारायले.