बार्देसांत आनीक 36 जमनी बळकायल्यात

भांगरभूंय | प्रतिनिधी

105 प्रकरणांतल्यान 2.29 हजार चौ. मि. लाटली; चवकशे खातीर प्रकरणां एसआयटी कडेन

भांगरभूंय । प्रतिनिधी

म्हापशें: बनावट कागदपत्रां तयार करून बार्देस म्हालांत आनीक 36 जमनी बळकायिल्ल्याचो प्रकार उजवाडाक आयला. ह्या म्हालांत आतां मेरेन वट्ट 105 प्रकरणांतल्यान 2 लाख 29 हजार चौखण मिटर जमीन बळकायिल्ल्याचें उक्तें जालां.

ह्या 36 जमनींची वळेरी विशेश तपास पंगडाक (एसआयटी) सादर केल्या. तातूंत बादे आसगांवच्यो 20, हणजूणेंच्यो 7, कळंगूटेच्यो 5,  पर्राच्यो 2 तशेंच रेईश मागूस आनी म्हापशेंचे दरेकी एके जमनीचो आस्पाव आसा.

जमीन बळकावपी टोळयेंतलो मुख्य दुबावीत मोहम्मद सुहैल शफी आनी विक्रांत शेट्टी हांचे सयत धिरेश नायक, शिवानंद मडकयकार, अल्ताप सी. ए., स्टीवन डिसोझा, सुनीलकुमार, अमृत गोवेकार आनी अंजूम खेळ (सुहैलाची घरकान्न) ह्या 9 जाणांक अटक केल्ली. हे सगळ्या दुबावितांक सध्या जामिनाचेर सोडल्यात.

संवसाराक अंतरिल्ल्या मूळ धनयाचे तो जिवो आशिल्ल्याचें सांगपी बनावट दस्तावेज तयार करून ते वरवीं ह्यो जमनी बळकायल्या. बेवारस आनी पडंग आशिल्ल्या जमनींचे सर्वे क्रमांक मेळोवन ते वरवीं ते जमनीचें पुर्तुगेज दस्तावेज पुरातत्व खात्याच्या कर्मचाऱ्यांक लागीं करून मेळयिल्लें. ते वरवीं बनावट कागदपत्रां तयार करून उपनिबंधक आनी मामलेदार तशेंच उपजिल्होधिकारी कार्यालया कडल्यान ह्यो जमनी बळकायल्यात, अशें चवकशेंत स्पश्ट जालां.

म्हापशेंची बळकायिल्ली 2 हजारां परस अदीक चौखण मिटर जमीन केंद्र सरकाराच्या रस्तो मंत्रालयाचे मालकीची आसा. हाचे वयल्यान दुबावीत टोळयेन सरकाराच्यो जमनी लेगीत सोडूंक नाशिल्ल्याचें स्पश्ट जालां. वयल्या 36 प्रकरणांतल्यान 60 हजार चौखण मिटर जमीन बळकायल्या. तातूंत विधानसभा वेंचणूक लडयिल्ल्या कांय राजकारण्यां सयत खुना सारक्या गुन्यांवांतल्या दुबावितांचो हात आसा. हेर प्रकरणां वांगडाच वयल्या सगळ्या 36 प्रकरणांचो तपासूय एसआयटी करता.

फातोड्डेंचे जमनीची 8 ऑगस्टाक सुनावणी

फातोड्डें मडगांवची जमीन बळकायिल्ल्या प्रकरणांत पुजा राणे, गोपाळ पुंडलीक पाटील, विद्या बाबू पाटील, महादेव चव्हाण आनी प्रदीप प्रकाश कलाल ह्या दुबावितांनी मडगांव जिल्हो सत्र न्यायालयांत अटकपूर्व जामिना खातीर धांव घेतल्या. हाचे वयली सुनावणी सोमारा 8 ऑगस्टाक जातली.

उगें- सांगेंचे जमनीची 8 ऑगस्टाक सुनावणी

उगें- सांगेंचे सरकारी मालकेची 45 हजार 321 चौखण मिटर जमीन बळकायिल्ल्या प्रकरणांत दुबावीत ज्योकीम मोंतेरो, जुझे अल्बुकर्क पिंटो आनी सेड्रीक कार्व्हालो हांणी अटकपूर्व जामिना खातीर धांव घेतल्या. सोमारा 8 ऑगस्टाक पणजेच्या जिल्हो आनी सत्र न्यायालयांत ताचेर सुनावणी जातली.