भांगरभूंय | प्रतिनिधी
भांगरभूंय । प्रतिनिधी
म्हापशेंः बार्देश बाजाराच्या 33 वर्धापन दिसा निमतान सुरू केल्ल्या भाजी आनी फळफळावर विक्री स्टॉलाचें उक्तावण प्रदेश भाजप अध्यक्ष सदानंद शेट तानावडे हांचे हस्तुकीं उक्तावण केलें. बार्देश बाजारान बऱ्या प्रतीचे कडन्न आनी हेर वस्तू माफक दरान विकून गिरायकांचो विस्वास मेळयला. सहकराक लागून बाजारभाव नियंत्रणात उरता अशें तानावडे हांणी ह्या वेळार सांगलें.
ह्या वेळार कर्नाटकांतल्या सहकार मळांतले प्रदीपराव जाधव, आदलो नगराध्यक्ष सुधीर कांदोळकार, संस्थेचो चॅरमन धर्मा चोडणकार, उपाध्यक्ष चंद्रकांत शेटगांवकार, संचालक एकनाथ नागवेकार हाजीर आशिल्ले. सहकार मळाची उदरगत जाल्यार जायत्या जाणाक नोकऱ्यो मेळपाक शकतात. कोणे कितलीं वर्सा सहकार मळार काडलीं हाचे परस ताणें कसलें काम केलें हांका म्हत्व आसता. बार्देश बाजाराचे संचालक हातांत हात घालून करतले अशी अपेक्षा तानावडे हांणी उक्तायली.
सहकार मळांत फायदो मेळोपा परस गिरायकांक सेवा दिवप म्हत्वाचें आसता. साबारांतल्या साबार मनश्याक सहकाराचें म्हत्व पटचें अशें काम बार्देश बाजारांत जावचे. मॉल उबारपाची तांची संकल्पना प्रत्यक्षांत येवो अशी सदिच्छा तांणी उक्तायली.
बार्देश बाजाराच्या कर्मचाऱ्यांच्या भुरग्यांक वर्सावळी प्रमाण शिष्यवृत्ती सोयऱ्याचें हस्तुकीं वितरीतकेली. वरीश्ठ वेवस्थापक विनोद खलप सेवानिवृत्त जाल्ल्यान तांचो भोवमान केलो. सुधीर कांदोळकार हांणी आपलें मनोगत उक्तायलें. सूत्रसंचालन संचालक एकनाथ नागवेकार हांणी केलें, उपाध्यक्ष चंद्रकांत शेटगांवका हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
