बाराजण सत्तरी घराची वणत कोसळ्ळी

घराची कोसळिल्ली वणत.

भांगरभूंय | प्रतिनिधी

कुटुंबाचेर घरा विरयत रावपाची पाळी; अर्थीक मजतीची मागणी

वाळपय: सत्तरी म्हालांतल्या खोतोडें पंचायत वाठारांतल्या बाराजण हांगासरल्या बुधाजी मयेंकार हांच्या घराची वणत कोसळून लुकसाण जालें. वणत उबारली ना जाल्यार कुटुंबाक घरा विरयत रावपाची पाळी येतली. हे खातीर थळाव्या आमदारान आनी सरकारान हे विशीं लक्ष दिवन ह्या कुटुंबाक अर्थीक मजत करची अशे तरेची मागणी ह्या कुटुंबान केल्या.

बुधाजी मयेंकार हांच्या घराची एक वटेनची वणत काल (शुक्रारा) सकाळीं अचकीत कोसळ्ळी. हाका लागून ह्या कुटुंबाक घरा विरयत रावपाची पाळी आयल्या. सुदैवान कसलीच जिवीतहानी जाल्ली ना. पूण घराची एक बाजू पूर्णपणान उक्ती जावन पावसांत ह्या कुटुंबाची व्हड प्रमाणांत धांदळ जावपाची शक्यताय आसा.

ही वणत पडिल्ल्यान ह्या कुटुंबाच्या घरगुती सामानाचें लुकसाण जालां. मयेंकार कुटुंब हे अर्थीक नदरेन गरीब आसा. हाका लागून ह्या कुटुंबाक सरकारान आनी थळाव्या आमदारान सहकार्य करचें अशी मागणी थळाव्यांनी केल्या.

मजगतीं, बुधाजी मयेंकार हांचे कडेन संपर्क सादलो तेन्ना तांणी सांगलें, अचकीत घराची एके वटेनची वणत कोसळ्ळी. आपली अर्थीक परिस्थिती कमकुवत आशिल्ल्यान घराची दुरुस्ती करप शक्य जालें ना. हाका लागून मातयेच्या घरांतूच आमी फाटलीं कितलींशींच वर्सां रावतात. काल अचकीत वणत कोसळिल्ल्यान आपल्या कुटुंबाचेर व्हड प्रमाणांत समस्या निर्माण जाल्या. हाची दखल थळावे आमदार विश्वजीत राणे हांणी घेवची अशी मागणी ह्या कुंटुबान केल्या.