भांगरभूंय | प्रतिनिधी
भांगरभूंय प्रतिनिधी
मडगांव : मडगांव पालिकेन मडगांवांतल्या कोयराचो विलो लावपा खातीर बायोमिथेशन प्रकल्पाचें काम मडगांव पालिकेन कंपनीक पयशे फारीक करूंक नाशिल्ल्यान 15 ऑगस्टा सावन बंद दवरपाची शिटकावणी कंपनीन पालिकेक दिल्या. पयशे फारीक केले उपरांत काम सुरू करतले अशें कंपनीन कळयलां.
मडगांव पालिकेन उर्जा बायोसिस्टम प्रा. लि. कंपनीक ह्या 5 टीपीडी प्रकल्पाचें दिल्लें. मडगांव एसजीपीडीए मार्केटा कुशीक पयल्या 5 टीपीडी बायोमिथेशन प्रकल्पाचें उक्तावण नोव्हेंबर 2021 वर्सा जाल्लें. ह्या प्रकल्पाचेर सुमार 2 कोटी 40 लाख रुपया खर्च केल्लो. कंपनी दर दिसा 5 टन ओल्या कोयराचेर प्रक्रिया करता. ह्या प्रकल्पांत 450 युनीट लायट तयार जातली जाल्यार 700 ते 1000 हजार कील सेंद्रीय सारें तयार जातलें अशें प्रकल्प सुरू करपा वेळार सांगिल्लें. उर्जा बायोसिस्टम प्रा लि. हे कंपनीचे कर्मचारी प्रकल्पांत काम करतात. तांकां दर म्हयन्याक पालिकेक पयशे फारीक करचे पडटात.
2022 सावन बायोसिस्टम प्रा. लि. कंपनीचे कर्मचारी हो प्रकल्प चलयतात. आतां मेरेन पालिकेन 60 टक्के रक्कम कंपनीक फारीक केल्या. 40 टक्के रक्कम फारीक करपाची आसा. ही रक्कम सुमार 71 लाख 51 हजार आसा. ते भायर स म्हयने प्रकल्प चलोवप, ताची जतनाय घेवप आनी ताची दुरुस्ती करप हो खर्च 11 लाख 20 हजार रुपया जाता. तो पालिकेन कंपनीक फारीक करूंक ना. मडगांव पालिकेन कंपनीक 82 लाख 72 हजार रुपया फारीक करपाचे आसात.
प्रकल्पाचें काम करपी कंपनीक कामगारांक दर म्हयन्याक पयशे फारीक करचे पडटात. मडगांव पालिकेन पयशे फारीक केले नात जाल्यार 15 ऑगस्टा सावन जतनाय, दुरुस्ती आनी प्रकल्पाचें काम बंद दवरपाची शिटकावणी कंपनीन पालिकेक दिल्या. पयशे फारीक केले जाल्यारूच परत काम सुरू करतले अशें कंपनीन कळयलां. मडगांव पालिका हाचेर कितें निर्णय घेता ताचेर प्रकल्पाचो फुडार निंबून आसा.
नगराध्यक्ष लिंडन परेरा हांणी बायोमिथेशन प्रकल्प सुरू आसा पूण बिला संबंदान तशेंच प्रकल्प बंद दवरपा संबंदान कांयच खबर ना म्हणपाचें सांगलें. हांव पालिका मुख्याधिकारी रोहित कदम हांचे कडेन चर्चा करून म्हायती घेतलों अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
