भांगरभूंय | प्रतिनिधी
2 नोव्हेंबर 2025 हो दीस भारतीय बायलां क्रिकेट इतिहासांत भांगरा अक्षरांनी बरयतले. कारण ह्या दिसा भारतीय बायलां पंगडान दक्षीण आफ्रिकेचेर 52 धांवड्यांनी जैत मेळोवन संवसारीक करंड उबारून इतिहासीक कामगिरी केली. ह्या खिणाची वाट 145 कोटी भारतीय लोक फाटलीं कितलींशींच दसकां पळयताले. आयतारा नवी मुंबयच्या डी. वाय. पाटील स्टेडियमाचेर दक्षीण आफ्रिके आड जाल्ल्या फायनल मॅचींत भारतीय बायलां पंगड जैत मेळोवन देशवासियांक दिवाळेची आगळी वेगळी भेट दितले हाची सुलूस शुक्रारा जाल्ल्या सेमी फायनलिंतूच लागिल्ली. ऑस्ट्रेलिये आड जाल्ल्या सेमी फायनलीचे मॅचींत जेमिमा रॉड्रिग्स हाणें दोळे दिपकावपी खेळ करून भारताक फायनलींत पावयलें. फायनलींत भारताची लडत दक्षीण आफ्रिके कडेन आशिल्ली. भारतीय पंगडान जर आपले तांकी प्रमाण खेळ करीत जाल्यार भारतीय पंगड संवसारीक करंडाचेर नांव कोरांतलो असो विस्वास देशांतल्या लोकांक आशिल्लोच. पूण दक्षीण आफ्रिकेक उणाक लेखपाची चूक भारतीय पंगड करचो नाशिल्लो. कारण सांखळी मॅचींत ह्या पंगडान भारताक हारयिल्लो.
दक्षीण आफ्रिकेन टॉस जिखून भारताक पयली बॅटींग दिली. शेफाली वर्मा आनी स्मृती मंधाना हांणी शेंकड्याची भागिदारी करून भारताक बरी सुरवात करून दिली. भारताची ऑपनर शेफाली वर्मान आक्रमक बॅटींग करून फक्त 78 बॉलांनी 78 धांवड्यो काडल्यो. विशेश म्हणल्यार तें भारताच्या मुखेल पंगडांत नाशिल्लें. प्रतिका रावल हाका दुखापत जाल्ल्यान ताची भारतीय पंगडांत निवड जाली आनी ताणें मेळिल्ल्या संदीचें भांगर केलें. आक्रमक बॅटिंगे बराबरच ताणें दोन विकेटी घेवन अश्टताशी कामगिरी केली आनी ‘प्लेयर ऑफ द मॅच’ पुरस्कारूय जिखलो. दीप्ती शर्मा ह्या आनीक एका अश्टताशी खेळगडयेन अर्दशेंकडो मारून बॉलिंगेंतूय पांच विकेटी घेतल्यो. सर्तींत 200 परस चड धांवड्यो आनी सगल्यांत चड 22 बळी हें ताच्या अश्टताशी कामगिरीची दखल घेवन ताका ‘प्लेयर ऑफ दी सिरीज’ पुरस्कारान भोवमानीत केलो. शेफाली आनी दीप्तीक स्मृती मंधाना, हरमनप्रीत कौर, जेमिमा रॉड्रिग्स, रिचा घोष हांणी बरो सांगात दिल्ल्यान भारतान 298 धांवड्यो काडल्यो.
फायनलींत ह्यो धांवड्यो फावोश्यो थारल्यो. भारताच्या सगल्याच बॉलरांनी बरी बॉलींग केल्ल्यान भारतान दक्षीण आफ्रिकेक 52 धांवड्यांनी सहज हारयलो. दक्षीण आफ्रिकेची मुखेली लॉरान शेंकडो मारून पंगडाक जैत मेळेावन दिवपाचो यत्न केलो. पूण तिचे यत्न अपुरे थारले आनी भारतान इतिहासीक जैत मेळोवन पयलेच फावटी संवसारीक करंडाचेर नांव कोरांतलें. भारतीय बायलांची ही कामगिरी बायलां क्रिकेट पंगडा खातीर संजिवनी दिवपी थारतली. कारण आमच्या देशांत बायलां क्रिकेटीक केन्नाच गंभीरतायेन घेनात. हाका मिडियाय आडवाद ना. मिडिया दादल्यांचे क्रिकेटीक जितली प्रसिद्धी दिता ताचे धा टक्केय प्रसिद्धी ते बायलांच्या क्रिकेटीक दिनात. बायलां क्रिकेट पंगडाच्या मॅचींक टीव्हीचेर लायव्ह गेम दाखयनात. हो संवसारीक करंड आशिल्ल्यान हाचें थेट प्रक्षेपण केलें. पूण द्विपक्षीय माळो टीव्हीचेर दाखयनात. बायलां क्रिकेट पंगडाक प्रायोजकूय मेळनात. अशें आसून लेगीत खेळगडयो मात आपले काम प्रामाणीकपणान करून देशाचो भोवमान वाडोवपाचो यत्न करतात हेंच ह्या संवसारीक करंडाच्या जैतान दाखोवन दिलें.
मजगतीं, भारताची उपमुखेली आनी मुखेल ऑपनर बॅटसमन स्मृती मंधानान संवसारीक करंड मॅचींनी बेस बरी बॅटींग केली. न्युझिलॅण्डा आड शेंकडो आनी ऑस्ट्रेलिया आनी इंग्लंडा आड आक्रमक अर्दशेंकडे मारून ताणें सातत्यपूर्ण आनी उत्कृश्ट बॅटींग केली. सेमी फायनलींत ऑस्ट्रेलिये आड 1000 एका दिसाच्यो धांवड्यो पुराय करपी ती दुसरी भारतीय बायल खेळगडी थारली. ताणें नामनेची खेळगडी मिताली राजच्या विशेश क्लबांत प्रवेश केलो. स्मृती आयजूय भारता खातीर सगल्यांत चड विस्वासू धांवड्यो काडपी खेळगडी आसा. आंतरराष्ट्रीय क्रिकेटींत एका दसका परस चड काळ खेळिल्ल्या स्मृतीन संवसारीक करंड मॅचींनी आक्रमकताय आनी स्थिरताय हाचो बरो मेळ सादलो.
हाचे आदीं भारताच्या 19 वर्सां पिराये खालच्या चलयांनी दोन फावटी संवसारीक करंड उबारलो. पूण वरिश्ठ पंगडाक संवसारीक जैत मेळोवपाक अपेस येतालें. दोन फावटी पंगड संवसारीक करंडाचे फायनलींत पाविल्लो. पूण त्या पंगडाक जैत मेळोवपाक अपेस आयिल्लें. ताका लागून भारताच्या वरिश्ठ पंगडाक जैत मेळोवप शक्य ना अशी टिकाय जाताली. सांखळी फेरयेंतूय भारतीय बायलां पंगडान सेगीत तीन मॅची व्हगडायले उपरांत ह्या पंगडाचेर टिका जावंक लागली. पूण भारताच्या बायलां खेळगड्यांनी हे टिके कडेन आडनदर केली आनी आपल्या खेळाचेर लक्ष केंद्रीत करून अशक्य दिसपी कामगिरी शक्य करून सगल्यांकूच अजापीत केलें. भारतीय बायलां पंगडान बॅटींग, बॉलींग, फिल्डींग ह्या तिनूय मळार अप्रतीम कामगिरी केली. मुखेली हरमनप्रीत कौर हाणें ह्या पंगडाचें फुडारपण कुशळटायेन केलें. ह्या पंगडाचे प्रशिक्षक अमोल मुझुमदार हांणी पंगडाक संवसारीक वस्ताद करपाक मोलाची कामगिरी केली. एकूणच सांघीक कामगिरी करून भारतान हें जैत मेळयलें. भारताच्या बायलां पंगडाची ही कामगिरी इतिहासिकूच आसा. भारताच्या ह्या खेळगड्यांचे कामगिरीक देशांतल्या 145 कोटी जनतेक सार्थ अभिमान आसा. बायलां क्रिकेटी खातीर हो खीण भांगराच्या अक्षरांनी बरोवपा सारको आसा. बायलां क्रिकेटीची उर्बा वाडोवपी हें जैत आसा.
दादल्यांचे क्रिकेटींत जें कपील देवाच्या पंगडान 1983 वर्सा केल्लें, तेंच हरमनप्रीत कौराच्या ह्या पंगडान करून दाखयलें. पयलेच फावटी संवसारीक करंड जिखून भारताच्या ह्या बायलां खेळगड्यांनी भारताचो तिरंगो अभिमानान हुबयलो. तशें पळोवंक गेल्यार भारताच्या बायलां पंगडान हाचे पयलीं लेगीत देशा खातीर खूबशे फावटी बरी कामगिरी केल्या. अशें आसून लेगीत भारतीय बायलां क्रिकेटीक देशांत गंभीरतायेन घेनात. जितली लोकप्रियता दादल्यांचे क्रिकेटीक मेळटा तितली बायलां क्रिकेटी मेळना ही दुर्दैवाची गजाल आसा. ह्या संवसारीक जैता उपरांत तरी देशांत बायलां क्रिकेटीक गंभीरतायेन घेतले अशी आस्त करुया. पयलेच फावटी संवसारीक करंडाचेर भारताचें नांव कोरांतून इतिहास घडोवपी भारतीय बायलां क्रिकेट पंगडाचें मना पसून अभिनंदन! चक दे इंडिया!! जय हो!!!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
