भांगरभूंय | प्रतिनिधी
डॉ. प्रमोद सावंत: 8 बायलांक भेटयल्यो ऑटो पींक रिक्षा
पणजीः बायलां आयज सगल्या मळार मुखार वचत आसात. हें पळोवन अभिमान दिसता. रिक्षा पायलट वेवसाय हो परंपरीक आसा. पूण तो वेवसाय उणो जायत चल्ला. आतां बायलांनी मुखार येवन ह्या वेवसायाक घटाय दिल्या. ह्या बायलां कडल्यान प्रोत्साहन घेवन हेर बायलांनी अशा विवीध वेवसायांत मुखार येवन स्वताच्या पांयार उबें रावचें. सरकारा वतीन तांकां सगली ती मजत करतले. ह्या बायलांक ईडीसी वतीन उण्या कळंतरान रीण दिलां. तशेंच रोटरी क्लबान तांकां अर्थीक सहकार्य केलां. हातूंत आनीक बायलांनी मुखार येवचें अशें आवाहन मुख्यमंत्री डॉ. प्रमोद सावंत हांणी केलें.
स्वातंत्र्य दिसा निमतान गोंय अर्थीक विकास म्हामंडळ आनी रोटरी क्लबा वतीन 8 बायलांक ऑटो पींक रिक्षा भेटफिल्ल्याच्या सुवाळ्यांत मुख्यमंत्री उलयताले.
ह्या वेळार अर्थीक विकास म्हामंडळाचे अध्यक्ष आनी भाजपाचे प्रदेशाध्यक्ष सदानंद तानावडे, रोटरी क्लबाचे गौरीश धोंड, पणजीचे म्हापौर रोहीत मोंसेरात तशेंच हेर मानेस्त हाजीर आशिल्ले. गोंयांतल्या रस्त्यार आतां खासा पींक ऑटो रिक्षा धांवतल्यो.
बायलां खातीर सरकार विवीध येवजण्यो राबयता. अर्थीक विकास म्हामंडळा वतीन ह्या बायलांक 2 लाख रुपया उण्या कळंतरान रीण दिलां. हीं बायलां स्वावलंबी जावचीं तशेंच आपल्या कुटुंबाचो तीं आधार जावचीं हे खातीर तांकां ह्यो पींक रिक्षा दिल्यात अशें मुख्यमंत्री सावंत हांणी म्हणलें.
गोंयांत व्हड प्रमाणांत पर्यटक येतात. ह्या बायलांक पर्यटकांचे सेवेचो लाव घेवंक मेळटलो. फुडारांत आनीक बायलांनी मुखार येवन हे सेवेचो लाव घेवचो अशें सदानंद तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
