भांगरभूंय | प्रतिनिधी
देशांत फुडारांत जावपी बालयांची अण्डर 17 संवसारीक फुटबॉल सर्त थारिल्ल्या प्रमाण जातली अशें उतर खेळां मंत्री गोविंद गावडे हांणी दिलें.
पणजेच्या मिनेझीस ब्रागांझा सभाघरांत आयोजीत एके कार्यावळींत ते पत्रकारांनी विचारिल्ल्या प्रस्नांक जाप दितना सांगलें.
फाटल्या सप्तकांत फिफान भारतीय फुटबॉल म्हासंघांत तिसऱ्या पक्षाच्या हस्तक्षेपा उपरांत फुटबॉल म्हासंघाचेर बंदी घाल्ली. तशेंच भारतांत जावपी सगल्यो फुटबॉल मॅची लेगीत अवैध घोशीत केल्ल्यो.
भारता खातीर सगल्यांत व्हडलो धपको दिवपी खबर म्हणल्यार बायलांची अण्डर 17 संवसारीक वस्तादपण सर्तीचें वस्तादपण काडून घेवप. पूण, आतां मंत्री गोविंद गावडे हांणी ही सर्त थारिल्ल्या वेळांतूच जातली असो विस्वास उक्तायला.
दिल्ली उच्च न्यायालयान नेमिल्ली प्रशासकांची समिती (सीओए) सर्वोच्च न्यायालयान रद्द केल्ल्या आनी वेंचणूक आतां 28 ऑगस्टा बदला 5 सप्टेंबराक जातली. ताका लागून संवसारीक सर्ती सयत देशांतर्गत जावपी सगल्यो सर्ती ह्यो थारिल्ल्या प्रमाण जातल्यो असो विस्वास गोविंद गावडे हांणी उक्तायला.
फिफान तृतीय पक्षाच्या हस्तक्षेपाक लागून भारतीय फुटबॉल म्हासंघाचेर बंदी घातिल्ली. ताका लागून बायलांची अण्डर 17 संवसारीक सर्तीची येजमानकी हातांतल्यान वता काय कितें अशी परिस्थिती उप्राशिल्ली. ते उपरांत ही बंदी काडपाच्या यत्नांत केंद्र सरकारान सर्वोच्च न्यायालयांत याचिका दाखल केली. ताचेर काल प्रदीर्घ सुनावणी जाली आनी हे सुनावणीक लागून आस्त निर्माण जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
