भांगरभूंय | प्रतिनिधी
बायलांक संद मेळची म्हूण नेमांत करतले बदल
पणजी: बायलांकूय आतां उजो पालोवपी दळांत काम करपाची संद मेळटा. बायलांची भरती प्रक्रिया सुरू केल्या. फुडले भरते वेळार उजो पालोवपी दळांत बायलांक संद दिवपा खातीर नेमांत गरजेचे ते बदल करतले अशें मुख्यमंत्री डॉ. प्रमोद सावंत हांणी सांगलें.
मंगळारा पणजे उजो पालोवपी दळाचे मुखेल कचेरेंत ‘जलद प्रतिसाद वाहन आनी बचाव बोटी’चें अनावरण मुख्यमंत्री डॉ. प्रमोद सावंत हांचे हस्तुकीं केलें. ह्या वेळार दळाचे अधिकारी आनी संचालक हाजीर आशिल्ले.
गोंयच्या उजो पालोवपी दळाचें कार्य खूब बरें आसा. गोंय हें ल्हान राज्य आसून उजो पालोवपी दळाचे कार्य पळोवन हेर राज्यांतलीं दळांय प्रशिक्षण घेवपा खातीर गोंयांत येतात. ही गोंयकारां खातीर अभिमानाची गजाल. गोंय उजो पालोवपी दळ हें आर्विल्ल्या तंत्रज्ञानांनी सुसज्ज आसा. सरकारा वतीन सगलीं आधुनीक यंत्रणां तशेंच हेर उपकरणां दळाक वेळावेळार दितात अशें मुख्यमंत्र्यान म्हणलें.
नवो मुख्यालय प्रकल्प मार्च 2023 वर्सा पुराय जातलो. नवे इमारतींत मुखेल कचेरी, उजो पालोवपी केंद्र, दळाच्या कर्मचाऱ्यां खातीर राबितो घरां, प्रशिक्षण सभाघर आनी परिशद सभाघर आसतलें. ही एक आधुनीक इमारत आसतली. उजो पालोवपी दळाक सगल्यो आधुनीक सुविधा पुरयतले अशें ह्या वेळार मुख्यमंत्री डॉ. प्रमोद सावंत हांणी म्हणलें.
गोंय सरकारान सगल्या सरकारी इमारतींचे फायर सेफ्टी ऑडीट करपाची प्रक्रिया हाचे पयलींच सुरू केल्या. हातूंत खूबशो सरकारी इमारती पोरणें पद्दतीच्यो आसात आनी थंयची यंत्रणाय अत्याधुनीक नाशिल्ल्याचें दिसून आयलां. त्या विशिश्ट इमारतीं मदीं अत्याधुनीक अग्नी सुरक्षा उपकरणां बसोवपा खातीर मार्गदर्शक तत्वां जारी केल्ल्याची म्हायती मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
