भांगरभूंय | प्रतिनिधी
मुरगांवः बायणा दर्यादेगेर बांदिल्ल्या पुलीस चौकीचें 14 जानेवारीक दनपारच्या 3.30 वरांचेर मुख्यमंत्री डॉ. प्रमोद सावंत हांचे हस्तुकीं उक्तावण जातलें.
बायणा दर्यादेगेर बांदिल्ली ही पुलीस चौकी स म्हयन्या आदीं उक्तावणा खातीर तयार आशिल्ली. ते चौकीचें बेगिनात बेगीन उक्तावण करचें, अशी मागणी ह्या वाठारांतल्या लोकांनी लावन धरिल्ली. ते चौकीचे लोखणाचे ग्रील्स अज्ञानांनी मोडून उडयल्यात. है चौकीची आनीक मोडतोड जावचे आदीं ती लोकां खातीर उक्ती करची, अशी लोकांची मागणी आशिल्ली. बोगदा आशिल्ल्या मुरगांव पुलीस स्टेशनाच्या वाठारांत मुरगांव मतदारसंघांतले एक ते णव प्रभाग येतात. आदीं सात, आठ, णव हे प्रभाग वास्को पुलीस स्टेशनाचे अखत्यारीत येताले. पूण कांय वर्सां आदीं तातूंत बदल केला. सात, आठ, णव हे प्रभाग बायणा वाठारांत येतात. ताका लागून एकादी वायट घडणूक, मारामारी वा हेर कांय प्रकार घडले जाल्यार कागाळ करचे खातीर बोगदाच्या पुलीस स्टेशनार वच्चें पडटा. तांकां सुमार 5 ते 6 किलोमिटराचो भोंवताडो मारचो पडटा. ही गैरसोय पयस करचे खातीर तशेंच गुंड प्रवकृत्तीक आळाबंद घालचे खातीर बायणा दर्यादेगे वयली पुलीस चौकी बेगीन सुरू करची, अशी लोकांची मागणी आशिल्ली. ते प्रमाण आयतारा 14 जानेवारीक ते चौकीचें उक्तावण जातलें. ह्या सुवाळ्याक मुखेल सोयरे म्हूण मुख्यमंत्री डॉ. सावंत हांचे वांगडा राज्यसभा खासदार सदानंद शेट तानावडे, येरादारी आनी पंचायत मंत्री मॉवीन गुदिन्हो, मुरगांवचे आमदार संकल्प आमोणकार, निमंत्रीत सोयरे म्हूण वास्कोचे आमदार कृष्णा साळकार, आयपीएस पुलीस म्हासंचालक जसपाल सिंग, उपविभागीय पुलीस अधिकारी वास्को जीपीएस एस. एम. सलीम, मुरगांवचे पुलीस निरिक्षक अलविटो रॉड्रिगीस हाजीर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
