भांगरभूंय | प्रतिनिधी
साधन सुविधा विकास म्हामंडळाचे उपाध्यक्ष दीपक नायक हांचें सांगणें
वास्को: बायणा नुस्त्या मार्केटाची दुर्दशा जाल्ल्यान थंय नवो मार्केट प्रकल्प बांदपाचो प्रस्ताव आसा. कांय तांत्रीक कारणा खातीर हें काम मुखार वचूंक शकलें ना. फुडारांत योग्य उपाय काडटले. कामाक जर वेळ लागता आसत जाल्यार मार्केटाची तात्पुरती दुरुस्ती करपाचें काम हातांत घेतले, अशें नगरसेवक आनी गोंय राज्य साधन सुविधा विकास म्हामंडळाचे उपाध्यक्ष दीपक नायक हांणी काल (सोमारा) सांगलें.
मुरगांवचे नगराध्यक्ष लिओ रॉड्रिगीश आनी उपनगराध्यक्ष अमेय चोपडेंकार, नगरसेवक दीपक नायक, नगरसेवक रामचंद्र कामत, नगरसेवक यतीन कामुर्लेंकार, नगरसेविका श्रद्धा महाले तशेंच मुरगांव पालिकेचे अभियंते हांचे सयत बायणा नुस्त्या मार्केटाची पळोवणी केली. तांणी थंय नुस्तें विक्रेत्या कडेन चर्चा केली. पालिका अभियंत्यांकूय कांय सुचोवण्यो केल्यो.
पळोवणे उपरांत दीपक नायक हांणी सांगलें, हांगा सुडा वतीन नवीन मार्केट इमारत बांदतले. पूण ह्या मार्केटाचे फाटले वटेन आशिल्ली सुवात ताब्यांत घेवपाच्या कामांक कांय तांत्रीक अडचणी निर्माण जाल्यात. ती सुवात ताब्यांत घेतले उपरांत नवी इमारत बांदपाचें काम सुरू करतले. जर ह्या कामाक कळाव जालो जाल्यार आमी दुरुस्तीचें काम हातांत घेवन नुस्तें विक्रेत्यांची गैरसोय पयस करतले.
ह्या मार्केटांत पयलीं 20 नुस्तें विक्रेते आशिल्ले. पूण सद्या थंय चारूच जाण नुस्तें विकतात. बायणा वाठारांत वेगळ्यावेगळ्या रस्त्या कुशीक कांय नुस्तें विक्रेते नुस्तें विकत आशिल्ल्यान ह्या मार्केटांत गिरायक येना. हे खातीर मार्केटांतल्या विक्रेत्यांनी मुरगांव पालिका, पुलीस आनी हेरांनी कागाळी केल्ल्यो. पूण तांचे कागाळीची दखल अजून घेतिल्ली ना. पूण ह्या प्रकरणांत दखल घेतना नायक हांणी म्हणलें, रस्त्याचे कुशीक नुस्तें विकप्यांक मुरगांव पालिका निरिक्षका वतीन सुचोवणी वजा शिटकावणी दितले. उपरांतूय तांणी रस्त्याचे कुशीक नुस्त्याची विक्री सुरूच दवरली जाल्यार तांचे नुस्तें जप्त करतले.
नगराध्यक्ष रॉड्रिगीश हांणी नुस्त्या मार्केटाची दुरुस्ती जावपाची वा थंय नवी इमारत बांदपाची गरज उक्तायली. हे विशीं रोखडोच उपाय काडटले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
