भांगरभूंय | प्रतिनिधी
भांगरभूंय । प्रतिनिधी
पणजीः बायंगिणी- पोरणे गोंयच्या कोयर विलो प्रकल्पाक कायदेशीर मान्यताय मेळ्ळ्या आनी हो म्हत्वाचो प्रकल्प सरकार चालीक लायतलें अशें कोयर वेवस्थापन मंत्री बाबूश मोन्सेरात हांणी सांगलां.
ह्या कोयर प्रकल्पाक विरोध आशिल्ल्या लोकांनी प्रकल्प उबारपाक न्यायालयांत आव्हान दिल्लें मात ताकां तातूंत येश मेळ्ळें ना अशें तांणी पणजे पत्रकारांक सांगलें. प्रकल्प उबारपाची प्रक्रिया आडावपा खातीर प्रकल्प विरोधकांनी सगळे यंत्रणे कडेन यत्न करून पळयले मात प्रकल्पाक जाय आशिल्ले सगले परवाने मेळ्ळ्यात. प्रकल्पाचो विशय सर्वोच्च न्यायालयांत आशिल्लो मात न्यायालयान ताका स्थगिती दिली ना. आता प्रकल्पाचें काम मार्गाक लागतलें अशें मोन्सेरात हांणी सांगलें.
प्रकल्प उबारपा खातीर हाचे पयलीं दोन फावट निविदा काडिल्ल्यो मात बोलीदार पात्र थारले नात. आता फुडल्या दोन म्हयन्यांत तिसरी निविदा काडटले अशी म्हायती तांणी दिली. कुमाजुवेंचो आमदार राजेश फळदेसाय हांणी आपूण आमदार आसमेरेन प्रकल्प जावपाक दिवचो ना, अशें सांगलां ताचें कितें अशें विचारलें तेन्ना फळदेसाय प्रकल्पाक विरोध आशिल्ल्या लोकां वतीन तें सांगतात मात आपूण तांची भावना समजपाक शकतां अशें मोन्सेरात हांणी सांगलें.
बांयगिणी कोयर प्रकल्प ही सध्याची सामकी गरज आसा अशें आपणे फळदेसाय हांका विधासभेंत सांगिल्ले. तो आतां आमदार जाला मात कोयर प्रकल्पाची प्रकिया खूब पयलीं पसून सुरू जाल्या अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
