भांगरभूंय | प्रतिनिधी
37वे राष्ट्रीय खेळांत आधुनीक पॅन्टाथलॉन सर्तींत गोंया खातीर पयलें भांगरां पदक जिखपी नेत्रावळीचो बाबू गांवकाराची सांग्यार पुराय मतदारसंघांत मिरवणूक काडली. ते मिरवणुकेंत समाज कल्याण मंत्री सुभाष फळदेसाय, अलका फळदेसाय, सांगें मतदारसंघांतल्या सगल्या पंचायतींचे सरपंच, पंच वांगडी, नगराध्यक्ष, नगरसेवक, भाजपा कार्यकर्ते आनी सांगेंतले नागरीक मिरवणुकींत वांटेकार जाल्ले.
ही मिरवणूक जांबावले श्रीदामोदराचें दर्शन घेवन थेट रिवण, मळकर्णे, कोटार्ली मार्गान सांगें नगरपालिका क्षेत्र, उगें पंचायत क्षेत्र, वालंकिणी, भाटी विलियम वाडे मार्गान नेत्रावळी मिरवणुकीचो समारोप जालो.
मिरवणुकीक सगल्या पंचातींनी तशेंच सांगें नगरपालिकेन येवकार दिलो. तशेंच फुडारा खातीर बाबू गांवकार हांकां शुभेत्सा दिल्यो. मिरवणुकींत जर्मनींत स्पेशल ऑलिंम्पीक खेळांत चार पदकां जिखिल्ल्या सिरा सरोदे ही लेगीत वांटेकार जाल्ली. तेच प्रमाण बाबूचे टेलेंट आयडेंटीफाय केल्ले निलेश, संध्या पालेकार, केतन वैज, विरेंद्र हे लेगीत मिरवणुकींत वांटेकार जाल्ले.
बाबू गांवकार हो वर्ल्ड पंगडांत वचपाक सज्ज जाला. ते खातीर ताका जी मजत लागतली ती आपूण दितलो, अशें मंत्री फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
