भांगरभूंय | प्रतिनिधी
पणजी पुलीस स्टेशन हल्लो प्रकरण
मडगांव, प्रतिनिधी : पणजी पुलीस स्टेशन हल्लो प्रकरणांत बाबूश मोन्सेरात हांची ३१ डिसेंबर मेरेन हाजीर न रावपाची मुजत सोंपली. उपरांत परत बाबूश हांचे वांगडा जेनिफर मोन्सेरात हांणी कायमचे हाजीर न रावपाची सूट दिवपाची मागणी केल्ली. न्यायालया कडल्यान बाबूश हांकां तीन म्हयने जाल्यार जेनिफर हांकां दोन म्हयने सुनावणेक हाजीर न रावपाची मेकळीक दिल्या. हे विशीं फुडली सुनावणी २४ जानेवारीक जातली.
मंत्री बाबूश मोन्सेरात हांचे वांगडा हेरां आड पणजी पुलीस स्टेशनाचेर हल्लो प्रकरणांत दक्षीण गोंय जिल्हो विशेश न्यायालयांत सुनावणी सुरू आसा. बाबूश मोन्सेरात आनी तांच्या समर्थकांनी १९ फेब्रुवारी २००८ त पणजी पुलीस स्टेशनाचेर हल्लो केल्ल्या प्रकरणांत हाचे पयलीं सुनावणे वेळार तेन्नाचे पुलीस निरीक्षक सुदेश नायक हांची सय नोंद केली. बाबूश हांकां ३१ डिसेंबर मेरेन सुनावणेक हाजीर न रावपाची परवानगी दिल्ली. बाबूश हांकां दोन फावटीं सुनावणेला हाजीर न रावपाची मेकळीक दिल्ली.
मजगतीं, बाबूश हांच्या वकिलां कडल्यान पणजेचे तेन्नाचे पुलीस निरीक्षक सुदेश नायक हांची उलटतपासणी परत घेवपाक मेळची अशी मागणी केली. बाबूश हांचे वकील डिसा हांचे कडल्यान नायक हांची उलट तपासणी पुराय जाल्या. पूण दुसर्या वकिलां कडल्यान उलट तपासणी करतना बाबूश आनी जेनिफर हांचे आड वता अश्यो कांय गजाली न्यायालयांत सांगल्यो. ताका लागून परत उलटतपासणेची मागणी केल्ल्या सरकारी वकिलां कडल्यान आक्षेप घेतिल्लो. ते प्रमाण न्यायालया कडल्यानूय नायक हांची परत उलटतपासणी घेवपाची बाबूश हांच्या वकिलांची मागणी भायर मारली. शुक्रारा जाल्ले सुनावणे वेळार सुदेश नायक हांची उलटतपासणी पुराय केली. हे विशीं फुडली सुनावणी २४ वेर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
