भांगरभूंय | प्रतिनिधी
मडगांव ः मायणा- कुडटरी वाठारांतल्या माकाझनां बापायन दांड्यान मारपेट केल्ल्यान सानिका दंभाळ हे स वर्सां पिरायेचे चलयेक मरण आयिल्लें. उपरांत दुबावीत सलीम दंभाळान (28) घडणूक थळा वेल्यान पळ काडलो. पुलीस दुबाविताचो सोद घेतात.
मेळिल्ले म्हायती प्रमाण, सोमारा रातीं उसरां स वर्सां पिरायेच्या चलयेक मारपेट केले उपरांत मरण येवपाची घडणूक घडली. हे घडणुकेची म्हायती मेळटकच मायणा कुडटरी पुलीस घडणूक सुवातेर पावलें. सलीम दंभाळ मुळ कर्नाटकाचो. तो रस्त्याचे काम करपाक गोंयांत आयिल्लो. हांगा येवन तांकां फकत आठ दीस जाल्ले. आयले उपरांत तो चार दीस मडगांवचे एके बागेंत रावून काम सोदपाक लागलो. ते उपरांत माकाझन येवन तांकां तीन दीस जाले. सोमारा रातीं स वर्सां पिरायेचे चली सानिका आवय कडल्यान कितें तरी मागपाक हट्ट करताले. त्याच खिणाक सोऱ्याचे घुंवळेंत आयिल्ल्या दुबावीत सलीम दंभाळान दांडो उखलून ताका मारपेट केली. हातूंत सानिकाचे तकलेक मार लागलो आनी गंभीर जखमी जावन मरण आयलें.
हाचे उपरांत दुबावीत सलीम घडणूक सुवातेवेल्यान पळून गेलो. मायणा कुडटरी पुलिसांनी घडणुकेच्या थळार वचून पंचनामो केलो. चलयेची कूड पोस्टमार्टमा खातीर दक्षीण गोंय जिल्हो हॉस्पिटलांत धाडल्या. तशेंच, मायणा कुडटरी पुलीस निरीक्षक अरुण गावस देसाय हांच्या मार्गदर्शना खाला दुबावीत सलीम हाचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
