भांगरभूंय | प्रतिनिधी
फोंडें, प्रतिनिधी: फाटल्या वर्सा ६ ऑगस्ट २०२३ दिसा बाणास्तारी पुलार रातच्या वेलार जाल्ल्या भिरांकूळ अपघाताक मंगळारा एक वर्स पुराय जाता. ह्या अपघातांत वट्ट तिगांक मरण आयलें आनी तीग जाणां जखमी जाल्लीं. अपघाता उपरांत आलिशान कार चालक श्रीपाद उर्फ परेश आत्माराम सिनाय सांवड्डेंकार (मूळ सांवड्डें, सध्या रा. मिरामार- पणजी) आनी ताची घरकान्न मेघना सिनाय सावड्डेंकार बरींच चर्चेंत आयिल्लीं. गुन्यांव फांट्या कडल्यान हे घडणुकेचो आजूनय तपास सुरू आशिल्ल्यान आजून मेरेन चार्जशीट दाखल करूंक ना.
खांडेपारा एका फार्मांत ६ ऑगस्टाक पार्टी खातीर गेल्ल्या श्रीपाद उर्फ परेश हांचे सयत ताची घरकान्न आनी तीन भुरगीं सांजेवेळार पणजे वतालीं. सांजेवेळार जीए- ०७- के- ७३११ क्रमांकाच्या मर्सडीज गाडयेंतल्यान पणजे वतना गाडी चालकाचे गाडये वयल्यान नियंत्रण गेलें. गाडयेन विरुद्ध दिकेन वचपी ५ वाहनांक धपको दिलो. हातूंत सुरेश फडते (५८), तांची घरकान्न भावना फडते (५२, रा. दिवाडे) आनी अरुप करमरकार (सध्या रा. बांदोडा, मूळ पश्चिम बंगाल) हांकां मरण आयिल्लें. जाल्यार वनिता भंडारी (२९, सांताक्रुझ- फोंडें), शंकर हळर्णकार (६७, बाणास्तरी) आनी राज माजगांवकार (२७, ताळगांव) हीं तिगांय जखमी जाल्लीं. अपघाता उपरांत गाडी कोण चलयतालो हाचे वेल्यान व्हडलो वाद, तर्क- वितर्क जाल्लो. मात पुलिसांनी अपघाता उपरांत कार चालक श्रीपाद उर्फ परेश हाची वैजकी तपासणी केली तेन्ना तांणी ९४ एमजी अंश सोरो पियेल्ल्याचें स्पश्ट जाल्लें. न्यायालयान पुलिसांक अटक केल्ल्या संशयिताक दोन कोटी रुपया जमा करपाचो आदेश दिल्लो. उपरांत दुबावितान दोन कोटी रुपया जमा केल्ले.
अपघाता उपरांत कार चालका संबंदी लोकां मदीं संभ्रम निर्माण जाल्लो. म्हाड्डोळ पुलिसांनी कार चालक श्रीपाद उर्फ परेश हाका अटक केले उपरांत तिडकल्ल्या लोकांनी ताची बायल गाडी चलयताली असो आरोप केल्लो. लोकांनी म्हाड्डोळ पुलीस स्टेशनाचेर रातच्या वेळार मोर्चो व्हेल्लो. तेन्नाचे उपअधीक्षक आशिष शिरोडकार आनी पुलीस निरीक्षक मोहन गावडे हांचेर लोकांनी प्रस्नांचो पावस घाल्लो. उपरांत हें प्रकरण गुन्यांव फांट्याचे सुवादीन केलें. गुन्यांव फांट्या वरवीं आजूनय कांय साक्षीदारांची जबानी घेवपाचें काम चालू आशिल्ल्यान चार्जशीट दाखल करूंक ना.
६ ऑगस्ट २०२० वीज खात्याचो ट्रक उमथल्लो
बोरयेच्या पुला लागसारा आशिल्ल्या धोको निर्माण करपी जंक्शनाचेर ६ ऑगस्ट २०२० दिसा वीज खात्याचो ट्रक उमथून भिरांकूळ अपघात घडिल्लो. तातूंत ३ वीज कर्मचार्यांक जाग्यारूच मरण आयिल्लें. ५ कर्मचारी जखमी जाल्ले. उपरांत तीन वर्सांनी ६ ऑगस्ट २०२३ दिसा बाणास्तारी पुलार मर्सडीज कार अपघातांत तिगांक मरण आयलें. ताका लागून ६ ऑगस्ट हो दीस फोंडें म्हाला खातीर भिरांकूळ अपघातांचो दीस थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
