भांगरभूंय | प्रतिनिधी
मडगांव, प्रतिनिधी : बाणावले वेस्टर्न बायपासचें काम सुरु आशिल्ले सुवातेर मडगांव पालिकेन कोयर उडयल्ल्यान बाणावले पंचायतीन मडगांव पालिका मुख्याधिकारी आनी नगराध्यक्षां आड पुलीशेंत कागाळ केली अशी म्हायती सरपंच झेविअर परेरा हांणी दिली.
मजगतीं, पालिकेन हो कोयर उखलपाक सुरवात केल्या.
बाणावलेचे आमदार व्हेंझी व्हिएगस, सरपंच झेविअर परेरा, समाजीक कार्यकर्ते रॉकी ङ्गर्नांडीस हांचे वांगडा हेरांनी बाणावलेच्या वेस्टर्न बायपास लागसारचे सुवातेर उडयल्ल्या कोयराची परत पळोवणी केली. मडगांव पालिकेन आदीं सांगिल्ले प्रमाण उडयल्लो कोयर ते सुवातेरच्यान काडपाक सुरवात केली. ते सुवातेर ५ ट्रक आनी १५ ते २० कामगार धाडिल्ले.
सरपंच झेविअर परेरा हांणी सांगलें, मडगांव पालिका बाणावले पंचायत वाठारांत कोयर हाडून उडयल्ल्यान हे विशीं बाणावली पंचायती वतीन मडगाव पालिका नगराध्यक्ष आनी मुख्याधिकारी हांचे आड पुलिशेंत कागाळ दिली.
आमदार व्हिएगस हांणी, मडगाव पालिकेन कोयर हाडून उडयल्ल्यान हो त्रास सगळ्यांक सोंसचो पडलो. कोयर उडयल्ल्याचें कळटांच कोयर थंयच्यान उखलपाची प्रक्रिया रोखडीच सुरू केली. नाजाल्यार हें अशेंच चालूंच उरपाचें. ताका लागून मडगांव पालिकेन हे विशीं उपाय करपाची गरज आसा. कोयराचो विलो लावपाची गरज आसा. फकत जागो ना म्हणून कोयर व्हरून दुसरे कडेन उडोवप योग्य न्हय, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
