भांगरभूंय | प्रतिनिधी
भांगरभूंय । खबरां मेज
पणजीः दृश्टी मरिनाच्या लायफ गार्डानी बागा- कळंगूटे आनी पाळोळें- काणकोण हांगा मेळून सात पर्यटकांक दर्यांत बुडटना वाटायले. तातूंत तीन भुरग्यांचो आसपाव आसा. ताकां बागा- कळंगूटे खोल उदकांत गेल्ले कडेन तांणी वाटायलें.
सध्या पर्यटन सिझनांत गोंयांत देशी पर्यटक व्हडा संख्येन येवपाक लागल्यान. दृश्टी मरिनाचे लायफ गार्ड सगल्या दर्या वेळांनी पेंवपाक वचपी पर्यटकांचेर नदर दवोरून आसतात. बागा हांका एका शेकांत रावपी दोन भुरगीं मेळनात म्हणून शेक धनयानी लायफ गार्डाची मजत घेतली आनी तांका सोदून काडलें.
पाळोळें दर्यांत एक जोडपें क्याकिंगान दर्यांत गेल्ले कडेन तें खडपाक आपटलें. तांची जाल्ली स्थिती लायफ गार्डांनी पळयली आनी जेटस्की वरवीं तांका सुरक्षीतपणान दर्या देगेर हाडलें.
कर्नाटकांतल्यान आयिल्ल्या तेरा जणांच्या पंगडांतले स जाण कळंगूटे दर्यांत पेंवपाक गेल्ले कडेन बुडपाक लागले. उदकाच्या झोता वांगडा ते खोल उदकांत पावले. तांणी मजती खातीर आड्यो मारपाक सुरवात करतगीर दर्शन आनी पांडू ह्या लायफ गार्डांनी सर्फबोर्ड, जेटस्की वरवीं तांकां ओडून दर्या देगेर हाडलें तातूंतल्या एकल्याक श्वास घेवपाक कुस्तार जावपाक लागल्ल्यान ताका लागींच्या हॉस्पिटलांत व्हेलें. मात दोतोरान ताका मरण आयिल्ल्याचें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
