भांगरभूंय | प्रतिनिधी
विरेश बोरकार हांच्या यत्नांक निमाणें येस
भांगरभूंय । प्रतिनिधी
पणजी : बांबोळी दर्यादेगेर बेकायदेशीर तरेन ग्रॅड हयात रिसोर्टान राखणे वणटीचें बांदकाम केल्ल्यान रिसोर्ट कंपनी मेअर्स गोवन हॉटेल्स अॅण्ड रिएल्टी प्रा. लि. हाचेर पर्यटन खात्यान बडी मारल्या. ही वणत पर्यटन खात्याचे मालमत्तेंत अतिक्रमण केल्याचे ठपको दवरून हे विशींचें बांदकाम बंद उडोवपाचो आदेश पर्यटन खात्याचे संचालक केदार नायक हांणी काडला.
ग्रॅण्ड हयात रिसोर्टाच्या सामकार दर्यादेगेर रिसोर्टाच्या वेवस्थापनान राखणे वणटीचें बांदकाम केल्लें. हें बांदकाम पुराय बेकायदेशीर आसा असो आरोप थळावे आमदार विरेश बोरकार हांणी करून हे विशींची कागाळ गोंय दर्यादेग वाठार वेवस्थापन प्राधिकरण आनी पर्यटन खात्या कडेन केल्ली. बोरकार हांचे कागाळीची दखल घेवन पर्यटन खात्यान ही कारवाय केल्या.
ग्रॅण्ड हयाताच्या वेवस्थापन मेअर्स गोवन हॉटेल्स अॅण्ड रिएल्टी प्रा. लि हाका हे राखणे वणटीचें बांदकाम बंद दवरपाचो आदेश काडून जे मेरेन पर्यटन खात्या कडल्यान कसलेय निर्देश येनात ते मेरेन हें बांदकाम आसा तशेंच दवरपाक सांगलां. ते भायर हें बांदकाम हें गोंय पर्यटन तळ राखण आनी देखरेख कायदो 2001 खाला उपद्रव म्हूण थारता. देखून हे दर्यादगेर हे राखणे वणटीचें बांदकाम केल्ले खातीर कारवाय कित्याक करची न्हय, हे विशीं जाप मागपी कारणां दाखयात नोटीस लेगीत पर्यटन खात्यान काडल्या. ह्या कारणां दाखयात विशींची सुनावणी 24 ऑक्टोबर 2025 ह्या दिसा सकाळीं 11 वरांचेर दवरल्या. देखून हे नोटिशेक जाप दिवपा खातीर पर्यटन संचालका मुखार आपलो प्रतिनिधी धाडचो, असो आदेश काडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
