भांगरभूंय | प्रतिनिधी
लोकांचें लाखांनी रुपयांचें लुकसाण
अनुराधा काणकोणकाराक सुमार 5 लाखांचो फटको
फोंडें: कुर्पासवाडो आनी धोंडशी बांदोडें वाठारांत बिरेस्तारा रातीं विजेचो दाब वाडिल्ल्यान वाठारांतल्या लोकांचें लाखांनी रुपयांचें लुकसाण जालें. कुर्पासवाड्यार अनुराधा काणकोणकार हांच्या घरांत शॉर्ट सर्कीट जाल्ल्यान साहित्य लासून व्हड लुकसाण जालें. उच्च दाबाचो फटको वाठारांतल्या सुमार 25 ते 30 घरांक बसलाे.
नागेशी, धोंडशी आनी कुर्पासवाडो वाठारांत बिरेस्तारा रातीं 9.45 वरांच्या सुमाराक अचकीत विजेचो दाब वाडिल्ल्यान खूबशा जाणांच्या घरांतले टीव्ही, फ्रीज आनी हेर विजेचेर चलपी साहित्य पेड्डेर जालें.
ह्या वेळार वाठारांतल्या लोकांनी शेजाऱ्यांक फोन करून विजे संबंदीची म्हायती दिली. कुर्पासवाड्यार अनुराधा काणकोणकार हांच्या घराच्या पयल्या माळ्यार धूर येवंक लागिल्ल्यान तपासणी केली तेन्ना विजेचेर चवपी यंत्रां लासून गोबर जाल्ल्याचें दिसून आयलें. ह्या वेळार थळाव्या तरणाट्यांनी धोको पत्करून उजो पालोवपाचो यत्न केलो.
उपरांत फोंडें उजो पालोवपी दळाच्या जवानांनी धांव घेवन उजो पालयलो. उज्यांत टीव्ही, एसी, फॅन आनी हेर साहित्य लासून गेलें. ह्या उज्याक लागून काणकोणकार कुटुंबाक सुमार 5 लाख रुपया परस चड लुकसाण जालें.
शॉर्ट सर्कीट जावचे पयलीं सेगीत वीज वताली. सदचे प्रमाण लायट वचत आशिल्ल्याच्या दुबावान घरांतल्या लोकांनी लक्ष दिलें ना. पूण पयल्या माळ्यार धुंवर येवंक लागिल्ल्याची म्हायती शेजाऱ्यांनी दिले उपरांत कुडींत वचून पळोवणी केली. पूण तो मेरेन उज्यांत सगलें साहित्य लासून गोबर जाल्ल्याचें अनुराधा काणकोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
