भांगरभूंय | प्रतिनिधी
भारता आड चालू आशिल्ले पयले टॅस्टीच्या दुसऱ्या दिसाचो खेळ सोंपलो त्या वेळार येजमान बांगलादेशाची स्थिती 8 बाद 133 अशी जाल्या. फास्ट बॉलर मोहम्मद सिराजान बांगलादेशाचो टॉप ऑर्डर गडगडावन उडयलो जाल्यार कुलदीप यादवान मदले फळयेंक खांवटे घाले. सिराजान 14 धांवड्यो दीत 3 जाल्यार कुलदीपान 33 धांवड्यो दिवन 4 विकेटी घेतल्यो.
ते पयलीं भारताचो पयलो डाव 404चेर सोंपलो. दुसऱ्या दिसा आर आश्विनान 58 आनी कुलदीप यादवान 40 धांवड्यांचें योगदान दिलें.
भारतान पयल्या दिसाच्या 6 बाद 278 धांवड्यां वयल्यान मुखार खेळपाक सुरवात केली आनी ताका रोखडोच धपको लेगीत बसलो. शेंकड्याच्या लागसार पाविल्लो श्रेयस अय्यर 86 धांवड्यो करून बाद जालो. ते उपरांत आश्विन आनी कुलदीप हांणी आठवे विकेटी खातीर 92 धांवड्यांची भागिदारी करीत पंगडाचो स्कोर 400च्या लागसार पावयलो.
आश्विन 58चेर बाद जाल्या उपरांत कुलदीपान टॅस्टींतली सर्वोत्कृश्ट खेळी करतना 114 बॉलांनी 40 धांवड्यो केल्यो. कुलदीप बाद जाल्या उपरांत उमेश यादवान 10 बॉलांनी नाबाद 15 धांवड्यो करून भारताचो स्कोर 404 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
