भांगरभूंय | प्रतिनिधी
भारता आडचे दुसरे टॅस्टींत येजमान बांगलादेशाचो पयलो डाव फकत 227 धांवड्यांचेर सोंपलो. ते उपरांत धांवड्यांचो फाटलाव करतना भारतान पयल्या डावांत बिनबाद 19 धांवड्यो केल्यात. मुखेली लोकेश राहुल 3 आनी शुभमन गील 14 धांवड्यो करून खेळपट्टीचेर आसा. सध्या भारत 208 धांवड्यांनी फाटीं आसा.
ते आदीं टॉस जिखून बांगलादेशान पयलीं बॅटींग करपाचो निर्णय घेतलो. पूण, भारताच्या बॉलरांनी बांगलादेशाक फाटोफाट धपके दिवपाक सुरवात केली. वट्ट 12 वर्सांनी टॅस्टींत पुनरागमन करपी जयदेव उनाडकट आनी आर आश्विन हांणी बांगलादेशाचो टॉप ऑर्डर हालोवन उडयलो. उमेश यादवान लेगीत तांकां बरी साथ दीत पयल्या दिसाच्या पयल्या सत्रांत बांगलादेशाची स्थिती 5 बाद 172 धांवड्यो अशी केली. च्या च्या विसवा खातीर खेळ थांबलो त्या वेळार बांगलादेशाच्यो 5 बाद 184 धांवड्यो जाल्ल्यो.
च्या च्या विसवा उपरांत मोमिनूल हकान बांगलादेशाक 200चो टप्पो हुपून दिलो. पूण, विसवा उपरांत उमेश यादवान बांगलादेशाक दोन धपके दीत डाव गुठलावपाचे प्रक्रियेक वेग दिलो. ताणें मेहदी हसनाक 15 जाल्यार नुरुल हसनाक 6 धांवड्यांचेर बाद करीत बांगलादेशाची स्थिती 7 बाद 219 अशी केली.
उमेश यादवान च्या च्या विसवा उपरांत लेगीत बांगलादेशाक धपके दिवप चालूच दवरले. ताणें तस्कीन अहमदाक एक धांवडेचेर बाद करून आपली चवथी विकेट घेतली. आश्विनान मोमिनूल हकाक (84) बाद करून बांगलादेशाक खर धपको दिलो. ते उपरांत खालेद अहमदाक शुन्याचेर बाद करून बांगलादेशाचो डाव 227 धांवड्यांचेर सोंपयलो.
आश्विनान 71 धांवड्यो दीत 4, उमेश यादवान 25 धांवड्यो दिवन 4 विकेटी घेतल्यो, ताका उनाडकटान 2 विकेटी घेत बरी साथ दिली.
जयदेव उनाडकटाचें 12 वर्सांनी पुनरागमन
मजगतीं, 12 वर्सांनी टॅस्टींत पुनरागमन करपी जयदेव उनाडकट हाणें फाटले मॅचींत मॅन ऑफ द मॅच पुरस्कार जिखपी कुलदीप यादवाचे सुवातेर खेळयलो. उनादकटान निमाणी टॅस्ट 16 डिसेंबर 2010त खेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
