भांगरभूंय | प्रतिनिधी
बांगलादेशान येजमान न्युझिलॅण्ड पंगडाक तीन टी-20 मॅचींचे माळेंतले पयले मॅचींत 5 विकेटींनी हारयलो. हांगाच्या मॅक्लीन पार्क मैदानाचेर बांगलादेशान टॉस जिखून न्युझिलॅण्डाक पयलीं बॅटींग करपाचें आमंत्रण दिलें. न्युझिलॅण्डान निर्धारीत 20 ओव्हरींनी 9 विकेटी वगडावन 134 धांवड्यो केल्यो. बांगलादेशान 18.4 ओव्हरींनी 5 विकेटी वगडावन जैत मेळयलें.
न्युझिलॅण्डाची सुरवात बरी जाली ना. डावाची सुरवात करपाक मैदानांत देंवपी फिल अॅलन एक आनी विकेटकीपर बॅट्समन टिम शेफर्ट शुन्याचेर बाद जालो. तिसरे सुवातेर बॅटिंगेक आयिल्ल्या डॅरिल मिचेलान 14 धांवड्यो केल्यो. ग्लॅन फिलिप्स शुन्याचेर बाद जालो. अशे तरेन न्युझिलॅण्डाचो स्कोर एका वेळार 5 बाद 50 असो आशिल्लो.
हांगाच्यान जिमी निशम आनी मार्क चॅपमन हांणी डाव सांबाळ्ळो. दोगांयनी मेळून 30 धांवड्यांची भागिदारी केली. मार्क 19 धांवड्यो करून बाद जालो. ते उपरांत मुखेली मिचेल सॅण्टनरान निशमाक साथ दिली. दोगांयनी 41 धांवड्यांची भागिदारी केली. सॅण्टनरान 23 आनी निशमान 48 धांवड्यो केल्यो.
टिम सावथी 8 आनी ईश सोधी 2 धांवड्यो करून तंबूंत परतलो. अॅडम मिल्नेन 2 आनी बेन सियर्सान 1 धांवडी केली.
बांगलादेशा वतीन शोरिफूल इस्लामान 3 विकेटी घेतल्यो, मेहदी हसन आनी मुस्तफिजुर रहमान हाणें दरेकी 2 विकेटी घेतल्यो.
मोखीचो फाटलाव करपी बांगलादेशा वतीन डावाची सुरवात करपी लिट्टन दासान सुरवाती सावन बरी बॅटींग केली. रॉनी तालुकदार 10 आनी नजमूल हुसैन शांतो 19 धांवड्यो करून बाद जालो. सौम्य सरकार 22 आनी तौहिद हृदय 19 धांवड्यो करपाक शकलो. अफिफ हुसैन लेगीत 1 धांवडी करून तंबूंत परतलो. बांगलादेशान 97 धांवड्यांचेर पांच विकेटी वगडायिल्ल्यो.
हांगाच्यान लिट्टन दासान मेहदी हसना वांगडा मेळून डाव मुखार व्हेलो. दोगांयनी सादूरतायेन खेळ करून विकेट राखपाचेर भर दिलो आनी गरजेच्यो धांवड्यो करून जैत मेळोवन दिलें.
न्युझिलॅण्डा वतीन टिम सावथी, अॅडम मिल्ने, जिमी निशम, बेन सियर्स आनी मिचेल सॅण्टनर हाणें एकेक विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
