भांगरभूंय | प्रतिनिधी
कोरगांव, बातमीदार: येरादारी कोयंडीक लागून उबे आशिल्ले कदंब बसी पोंदाक हातांतल्यान पडिल्लें खेळणें काडपा खातीर गेल्लें देड वर्साचें चली चिड्डत म्हणून बसी पोंदच्यान भायर काडलें. मात जखमी जाल्ल्यान हॉस्पिटलांत ताका मरण आयलें. हे घडणुकेक लागून हणखणें बोवाळ जाला. हे विशीं मोपा पुलीसांनी आनी कदंब महामंडळाच्या अधिकार्यांनी घडणुके सुवातेर भेट दिवन पळोवणी केली. कदंब बस पुलिसांनी ताब्यांत घेतल्या. फुडलो तपास पुलीस निरीक्षक नारायण चिमुलकार हांच्या मार्गदर्शना खाला चालू आसा.
ही घडणूक मंगळार १२ डिसेंबराक सांजेवेळार सुमार साडे सात वरांचेर घडिल्ली. हातूंत कदंब चालकाची कांयच चूक नाशिल्ल्याचें मरण आयिल्ल्या भुरग्याच्या बापायन पुलिशेंत बरोवन दिलां, अशें मोपा पुलीस निरीक्षक नारायण चिमुलकार हांणी म्हायती दितना सांगलें.
ही कदंब वाळपयच्यान सांजेवेळार इब्रामपूर वताली. तेन्ना हणखणे मुखेल रस्त्यार येरादारीची कोंयंडी जाल्ल्यान राविल्ली. त्याच वेळार त्या भुरग्याचे पालक उबे केल्ले गाडयेंतल्यान सामान काडटाले. मजगतीं ते गाडयेंतल्यान देंविल्ल्या त्या भुरग्याच्या हातांतल्यान उबे आशिल्ले चली बसी पोंदाक गेलें. हाची कल्पना कदंब बस चालकांक नाशिल्ली. चालकान बस मात्शी फुडें व्हरताच ती चली बसी पोंदाक चिड्डतली म्हणून कोणें तरी थंयच्यान तिका उखल्ली. ह्या वेळार तिका कमरे कडेन ल्हानशी दुखापत जाल्ली अशें कळ्ळां.
हे विशीं मोपा पुलीस नारायण चिमुलकार हांणी दिल्ले म्हायती प्रमाण, ती चली जखमी जाल्ल्यान तिका धारगळे हॉस्पिटलांत व्हेल्ली. थंयच्यान तिका उपचारा खातीर फुडें धाडलें. थंय तिचेर उपचार चालू आसतना मरण आयलें. हे विशीं कदंबा चालक आनी ते चलयेचो बापूय हांणी जबानी पुलिसांनी घेतल्या अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
