बऱ्या कुटुंबा खातीरभौतिकवादाचेर जैत गरजेचें

भांगरभूंय | प्रतिनिधी

आयज 1 जानेवारी. जागतीक कुटुंब दीस (ग्लोबल फॅमिली डे). आधुनीक काळांतल्या ‘इजम्स’ चेर आदारीत जागतीक क्रांतीचे वटेन वतना, कुटुंबीक बंधनां आतां समाजांत पळोवंक मेळनात. भौतीकवाद, अहंकार, मत्सर, दुस्वास, दुबाव, असंतोश, अविश्वास, सर्त आनी कोडूपण हांचो प्रभाव कुटुंबांनी दिसता. जाका लागून कुटुंबाची संकल्पना फिकी पडपाक लागल्या. ह्या नकारात्मक गुणधर्मांच्या जाग्यार निस्वार्थी मोग, आदर, बलिदान आनी एकामेकां कडेन निश्ठावान रावप, अशा सकारात्मक गुणांचो सुगंध पातळावपाची गरज आसा.
खंयच्याच संवसारीक कायद्यान मनशाचे हे गुणधर्म सुदारप शक्य ना आनी म्हणुनूच तांकां साध्य करपा खातीर ईश्वरी संलग्नताय गरजेची. अहंकार/ दुस्वास/ असंतोष/ सर्त हे दुर्गुण ईश्वराचेर घट्ट श्रद्धा दवरून हारोवंक मेळटात. ईश्वरी शक्तीच्या सकारात्मक प्रभावान दुबाव/ अविश्वास/ कोडूपण पयस करूं येता. मरणाची सतत याद दवरून, ह्या तात्पुरत्या संवसारांत सगळें फाटीं सोडपाचें आसा हो विचार आनी निमाणें दरेकल्याक ईश्वराक जाप दिवपाची आसाय जाचो न्याय, संपत्तीचेर न्हय तर हांगा केल्ल्या बऱ्या कर्तुबांचेर जाता, ही जाणीव दवरून भौतीकवादाक (मॅटेरियलिझम) जिखूंयेता. देखून आमचीं कुटुंबां बऱ्या खातीर बदलपाक ह्या मुळाव्या आदर्शांक बळगें दिवपाची गरज आसा.
आमी खंयच्यान आयल्यात, जिविताचो उद्देश कितें आनी खंय परत वच्चें आसा, अशा कांय प्रस्नांच्या जापांचेर दुरदृश्टी दवरून एक नास्तीक सुद्धा नैतीक जर्जरपणांतल्यान स्वताक, कुटुंबाक वाचोवपा खातीर योग्य दिका मेळोवं शकता.
कुटुंब, सुदृढ व्यक्ती निर्माण करपाक पिकाळ जमीन दिता. बऱ्या कुटुंबांत तयार जाल्लीं व्यक्ती समाजा खातीर उत्पादक आसता. एक नाखूश मनीस ताची उर्जा, जिणेची आवड उणी जाल्ल्यान समाजा खातीर योगदान दिवपाक पावना. कुटुंब जिणेंतल्यान निराश जाल्लो मनीस समाजांतल्या हेर कडेन राग रितो करपाचो यत्न करतलो. ताका सुखद वातावरण तयार करपाक जावचें ना. ताचे उत्पादकतेचेर वायट परिणाम जातलो, हें निश्चीत. तो भेट दिता थंय वाद जातले. अशे तरेन समाज दुस्वास आनी हिंसाचारान भरतलो. कुटुंबीक वाद आशिल्ले व्यक्तीक आत्महत्या करीन दिसता. आपले प्रतिभेन आनी क्षमतेन समाजाक फायदेशीर थरपी जिवीत अशे तरेन सोंपता. कुटुंबीक वाद आशिल्लीं भुरगीं शिक्षण आनी करियराचेर उणें लक्ष दितात. अशे तरेन समाजाचे उदरगतीचेर परिणाम जाता. चडशे गुन्यांवकार अस्वस्थ कुटुंबीक वातावरणाक लागून तयार जातात, अशें सर्वेक्षणांतल्यान दिसून येता. कुटुंबीक समस्या आशिल्ल्यांक लोकांक वेसनां लागता. समाजाची रचणूक जिचेर आदारून आसता, ती बुन्याद म्हळ्यार कुटुंब.
कुटुंबाची सुरवात घोव- बायलेच्या नात्यान जाता. तें सुरू करपाक निश्ठावान, कायदेशीर संबंद आसप गरजेचें. लग्नाक लागून दादले आनी बायल हांचें बंधन घट जाता. कारण जोडपें नात्याक चड बांदील आसता. तातूंतल्यान सुखी जिवीत जगपाक गरजेची आशिल्ली अर्थीक, समाजीक आनी मानसीक थीरताय तांकां मेळटा. लग्नाच्या भायर हेर सगळे बेकायदेशीर संबंद फकत तात्पुरत्या समाधान दिवंक शकतात, तातूंत हक्क आनी वचनबद्धताय नाशिल्ल्यान ते निमाणें तुमकां एकटे सोडटात. लग्नां सादेपणान केल्यार कुटुंबांक जावपी त्रास कमी जातात. हाका लागून वेळार लग्न जावपाकय आदार जाता आनी लग्नांक कळाव जाल्ल्यान समाजांत जावपी दुश्टपणां पयस जातात.
योग्य जोडीदार वेंचप लेगीत गरजेचें. कारण तो तुमच्या जिविताचो भाग. फुडले पिळगेक तयार करपी आनी तांचो आदार जावपी. नव्या हुंडो पद्दतीच्या रुपांत, उत्पन्नाचो फायदो मेळोवपाक फकत काम करपी बायलांक लग्ना खातीर प्राधान्य दिवप हें कुटुंब वेवस्थेक धोको निर्माण करता, कारण भौतीकवादी मागणी पुराय करपाक बायलांक मागीर घरगुती जबाबदारी आनी भुरगीं वाडोवप कुशीक दवरचें पडटा. अर्थीक नदरेन दुबळ्या वा घरगुती काम पसंत करपी चलयांच्या लग्नाक धोको सुद्धा हे खातीर निर्माण जावपाक लागला.
सामान मुल्यां आनी समजुती आशिल्ले जोडीदार नात्यांत शांतताय हाडटात. जोडीदारां मदीं खरो मोग, काळजी, विस्वास आनी सुरक्षीतताय, तशेंच कुटुंबांतल्या एकामेकांच्या योगदानाक मोल दिवप हे शांतीकायेंत आनीक भर घालता. संवसारांत एकेच व्यक्तीचेर वजन येवचें न्हय म्हणून कामाचे वाठार विभागून कठीण काळांत एकामेकांक आदार दिवपाची गरज आसा. फकत बायलांकच मावाची जतनाय घेवपाची गरज आसा, ही रूढ कल्पना मोडून दोगांयच्या मांवां विशीं बायलेक आनी घोवाक हुस्को आसूंक जाय. एकामेकांचीं गुपितां आनी दुबळेपणांचेर पड्डो घालून आपसांतले ल्हान वाद स्वता मदीं सोडल्यार व्हड वाद टाळटात.
जोडपें पालक जालें म्हणटकच तांणी पालकत्वाची तपासणी करची. सादारणपणान भुरग्यांक फुडारा खातीरची मालमत्ता म्हणून वाडयतात. जी पुराय जाली ना जाल्यार पालकांक निरशेवणी येता. भुरग्यांक एक जापसालदारकी म्हणून वाडोवंक जाय. जाका लागून पालक भुरग्यांक योग्य वागणूक दिवंक शकतात. भुरग्यां मदीं भौतीकवादी धारणा रुजोवचे बदला तांकां नैतीकता, मनीसपण आनी शिस्त हांचे कडेन वळोवपाक प्रभावी पालकत्व गरजेचें. पालकांनी स्वता आदर्श जावन जर भुरग्यांक समजायले तर ताचो बरो परिणाम जाता.
हार आनी जिखप ह्या दोनूय परिस्थिती खातीर भुरग्यांक प्रशिक्षण दिवंक जाय. तांकां कुटुंबा कडेन जोडून दवरपाक स्वातंत्र्य वांगडा योग्य प्रशिक्षण गरजेचें, जें तांकां समाजीक दुश्टपणा पासून वाचयतलें. दुबळ्या पालक- भुरग्यांच्या बंधनाक जापसालदार आशिल्ले नकारात्मक गूण म्हळ्यार भुरग्यांचो अपमान करप, तांच्या दुबळेपणां आनी गुपितांचेर हेरां मुखार चर्चा करप, तांच्या उत्पन्नाची तुळा करप, भुरग्यांचेर अतिरिक्त मागणी लादप आनी लग्नाक कळाव करप. भुरग्यां कडेन पालकांनी आपणावपाचे सकारात्मक गूण म्हळ्यार भुरग्यांच्या केल्ल्या बऱ्या कामगिरीची कदर करप, अयोग्य वागणुकेचो निशेध करप, कुटुंबांतले निर्णय घेवपा खातीर एकामेकांचो सल्लो घेवप आनी चले- चलयांक वारसा हक्कांत फावो ते हक्क दिवप, हे गरजेचे आसा.
आयज चलयो शिक्षण, नोकरी तशेंच कुटुंबांत चल्यां परस चड फुडाकार घेतात. कांय चले कसलीच अर्थीक वा कुटुंबीक जापसालदारकी घेवपाक तयार नासतात. ‘बेटा बचाओ, बेटा पढाओ’ असो नारो दिवन चलयांच्या वाडपाचेर खाशेलें लक्ष दिवन तांची शिक्षणीक, अर्थीक आनी कुटुंबीक जापसालदारकी घटमूट करप गरजेचें. योग्य पालकत्वांत, पालक आनी भुरग्यां मदीं मोगाळ नातें तयार जातलें. बदलाक भुरगीं आपलीं कर्तव्यां कटकट करिनासतना पाळटलीं. अशी भुरगीं जाणटेपणान पालकांचो आदर, मोग करतलीं आनी काळजी घेतलीं. तशें जाल्यार, वृद्धाश्रमा खातीर सुद्धा जागो उरचो ना.
मागण्यो नियंत्रणांत दवरप आनी मर्यादीत खर्चान, कुटुंबीक वेव्हार समंजसपणान चालोवप, फकत परवडपी साधनां घेवन, रिणांचो भार पयस दवरून, फकत गरजेच्योच कुटुंबीक कार्यावळी करप हें ताण मुक्त कुटुंबीक वातावरणाची खात्री दिता. फुडाराचे परिणाम ना करता. कायदेशीर कमाई कुटुंबांक खोस आनी शांती दिता. जें उमेदी, समाधानी जिणे खातीर म्हत्वाचें.
जशी घराची बुन्याद भुंयकांपाक प्रतिकार करपाक तयार केल्ली आसता तशेंच कुटुंबाकय कठीण काळांत प्रतिकार करपाक घटमूट बुन्यादीची गरज आसता, जी ईश्वरा वयलो घटमूट विस्वास, घटमूट कुटुंबीक बंधनां, परस्पर सहकार्य, नैतीकता आनी शिस्त हांचे पासून मेळूंक शकता. खर्चीक भेटवस्तू आजिवन बंधनकारक संबंद स्थापन करूंक शकना, पूण फकत तात्पुरती सुखाची यंत्रणा म्हणून काम करूं येता. ईश्वराक केंद्रबिंदू दवरून संबंद, करियर, समाजीक वावर हांचे मदीं न्याय्य पद्दतीन समतोल दवरल्यार संतुलीत जिवीत सांबाळपाक मदत जाता.

नझराना दरवेश
8975074456