भांगरभूंय | प्रतिनिधी
साळपेंकारांचो बसकेंत निश्चेव
म्हापशें: बर्जर बेकर पेंट कंपनीच्या विरोधांत साळपें ग्रामस्थांनी एकठांय येवन ‘बर्जर कंपनी हटाओ, साळपें बचाओ’ च्यो घोशणा दिल्यो. पिळर्ण उद्देगीक वसणुकेंतली ही कंपनी लोकवस्तींतल्यान रोखडीच हेर कडेन स्थलांतरीत करची अशी मागणी थळाव्या लोकांनी केली. तशेंच साळपें ग्रामस्थ प्रदुशण विरोधी मोर्चा, हे समिती वतीन कंपनीच्या विरोधांत न्यायालयांत जनहीत याचिका दाखल करपाचो निश्चेव ग्रामस्थांनी केलो.
बुधवारा सांजवेळा साळपेकारांची गांवांतल्या व्हॉलिबॉल मैदानार बसका जाली. लोकांनी हे कंपनीक लागून गांवा सयत लोकांचे भलायकेचेर जाल्ले दुश्परिणाम आनी स्वता भोगिल्ले परिणाम सांगलें. हाचे मुखार साळपेंकार आपलो गांव सोडून वच्चे नात जाल्यार ह्या बर्जर कंपनीनूच गांव साेडून वच्चें अशी मागणी केली.
गांवांतले हवेचें निरिक्षण सेगीत तपासत रावचें अशें गोंय प्रदुशण नियंत्रण मंडळाक निवेदन दिवप. गांवांत विवीध कडेन हवाई निरिक्षण तपासणी यंत्रणा उबारप, तशेंच हे देखरेखीची वेळावेळार म्हायती गांवच्या लोकांक दिवप अशी मागणी ह्या निवेदनांत करपाचें थारलें.
पंच वांगडी दिनेश मोरकारान म्हणलें, ह्या पेंट कंपनीक लागून गांवाचेर विपरीत परिणाम जाला. खंयचेय स्थितींत ही कंपनी हे लोकवस्तींतल्यान हेर कडेन हालोवची. थळाव्या पंचायत मंडळाचो लोकांक पुराय तेंको आसा.
थळावे नागरीक जॉन त्रिनीनादान म्हणलें, साळपें गांवांत पियेवपाच्या उदकाचो प्रस्न उप्रासला. सगल्यो बांयो दुशीत जाल्यात. ह्यो पुर्तुगेज काळांतल्यो बांयो बाराय म्हयने उदक दिताल्यो. पूण ह्या पेंट कंपनीच्या घातक रसायनाक लागून आमच्यो बांयो दुशीत जाल्यात. उजो दुर्घटणेक लागून भलायकीची गंभीर समस्या आसा. तकली दुखप, जोर, खांक, थंडी, स्वास घेवपाचो त्रास जायत आसा असो दावो तांणी केलो.
दीसभर व्हांवपी दुशीत हवेक लागून जीव घुस्मट्टा. ताका लागून घराचीं दारां, जनेलां बंद करून लोकांक घरांतूच बसप भाग पडलां. हे समस्येचेर सरकारान कायमचो उपाय काडून कंपनी हेर कडेन हालोवची अशी विनंती ज्येश्ठ नागरीक मारिया फर्नांडीस हांणी केली.
साळपें ग्रामस्थ प्रदुशण विरोधी मोर्चा समिती पुनरुज्जीवीत करप आनी प्रशासकी अधिकाऱ्यां सयत विवीध खात्यां कडेन फाटपुरवण करप, गांवांतल्या बांयांचें उदक आनी हवा प्रदुशणाची गुणवत्ता प्रशासनान अजून दिल्ली नासून सरकारान ती वेळावेळार दिवची अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
