भांगरभूंय | प्रतिनिधी
ट्रक चालकाक जाग्यारूच मरण; तरणाटी गंभीर जखमी
फोंडें: बरकटें- मोल्यां राष्ट्रीय म्हामार्गार कर्नाटकांत वचपी प्रवाशी बस आनी म्हाल व्हरपी ट्रक हांचो एकामेका सामकार धपको बसून जाल्ल्या अपघातांत बशीतले खूबशे प्रवासी जखमी जाले. अपघातांत ट्रक चालकाक (नांव कळ्ळें ना) जाग्यारूच मरण आयलें. अपघाता उपरांत आडकून पडिल्ल्या प्रवाशांक फोंडें उजो पालोवपी दळाच्या जवानांनी भायर काडले. अपघातांत जखमी जाल्ल्या प्रवाशांक रोखडेंच पिळयेंच्या भलायकी केंद्रांत दाखल केले.
मेळिल्ले म्हायती प्रमाण गोंया सावन कर्नाटकांत वचपी जीए 07 टी 0548 क्रमांकाची प्रवासी बस अती गतीन मोलेंचे दिशेन वताली. त्या वेळार विरुद्ध दिशेन येवपी केए 65 ए 3760 क्रमांकाच्या म्हाल व्हरपी ट्रकाक बशीचो धपको बसलो. त्या वेळार ट्रका फाटल्यान येवपी मोटारीक लेगीत बशीचो धपको बसलो. अपघातांत मोटारींतले सगले जाण सुखरूप वाटावले. अपघातांत बशीतले खूबशे प्रवासी जखमी जाले. हातूंत एके तरणाटेच्या पोटांत लोखंडाची सळी घुशिल्ल्यान गंभीर जखमी जाली.
अपघाताची म्हायती मेळटकच 3 एम्बुलन्सी घडणूक थळार दाखल जाल्यो. जाल्यार फोंडें उजो पालोवपी दळाच्या जवानांनी बशींत आडकून पडिल्ल्या चालकाक भायर काडून हॉस्पिटलांत दाखल केलो. कुळें पुलिसांनी लेगीत रोखडीच धांव घेवन मजत कार्याक सुरवात केली. निरिक्षक राघोबा कामत हांच्या मार्गदर्शना खाला अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
