भांगरभूंय | प्रतिनिधी
पणजी पुलीस स्टेशनार गुन्यांव नोंद
पणजी: येरादारी खात्यांत 2010 वर्सा बनावट अणभव प्रमाणपत्र सादर करून नोकरी मेळयिल्ल्याचो प्रकार मुखार आयला. ह्या प्रकरणांत पणजी पुलिसांनी सहाय्यक मोटार वाहन निरिक्षक दत्तप्रसाद गणेश नायक (मडकय-फोंडें) हाचे आड गुन्यांव दाखल केला.
पणजी पुलिसांनी दिल्ले म्हायती प्रमाण ह्या प्रकरणांत येरादारी खात्याचे उपसंचालक नॅन्सी फर्नांडीस हांणी कागाळ दाखल केल्या. ते प्रमाण सहाय्यक मोटार वाहन निरिक्षक दत्तप्रसाद गणेश नायक हाणें मेरशेंतल्या खाप्रो गॅरेजींतल्यान एका वर्साचें अणभव प्रमाणपत्र 16 डिसेंबर 2010 दिसा खात्यांत सादर केलें.
त्या प्रमाणपत्राची आनी हेर प्रक्रिया पुराय करून नायक हाका खात्यांत सहाय्यक मोटार वाहन निरिक्षकपदार नेमणूक केली.
ह्याच वेळार नायक हाणें बनावट अणभव प्रमाणपत्र सादर केल्ल्याची म्हायती खात्याक मेळ्ळी. ते प्रमाण खात्या खाला मुळावी चवकशी केली तेन्ना तें प्रमाणपत्र बनावट आशिल्ल्याचें मुखार आयलें.
ते प्रमाण पणजी पुलीस स्टेशनार कागाळ नोंद केली. हाची दखल घेवन पुलीस निरिक्षक विजयकुमार चोडणकार हांच्या मार्गदर्शना खाला बायल उपनिरिक्षक रश्मिका कवळेंकार हांणी दत्तप्रसाद गणेश नायक हाचे आड भारतीय दंड संहितेच्या विवीध कलमा खाला गुन्यांव दाखल केला.
पुलिसांनी नायक हाका नोटीस दिवन चवकशेक हजर रावपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
