भांगरभूंय | प्रतिनिधी
कोलकाता, खबरां संस्था: अस्तंत बंगालांतल्या दुर्गापूर हांगचे एके वैजकी विद्यार्थीनीचेर जाल्ल्या सामुहीक बलात्कार प्रकरणांत पुलिसांनी तीन आरोपींक अटक केल्या. दोग अजूनय फरारी आसात. 10 ऑक्टोबराक रातच्या सुमार 8 ते 9 वरां मजगतीं ही घडणूक घडली. पिडेस्त आपल्या इश्टा वांगडा जेवपाक भायर गेल्ली तेन्ना तिचेर तीन तरणाट्यांनी सामुहीक बलात्कार केलो.
कोलकाता सावन 170 किमी अंतराचेर दुर्गापूरांतल्या खाजगी वैजकी म्हाविद्यालया मुखार ही घडणूक घडली. हे विशीं पुलिसांनी दिल्ले म्हायती प्रमाण, पिडेस्त चली तिच्या इश्टा सयत जेवपाक भायर गेल्ली. कॅम्पसाचे गेटीचेर तीग तरणाटे उबे आशिल्ले. तांणी पिडेस्ताचो फोन काडून घेतलो आनी उपरांत तिच्या केंसांक धरून कॅम्पसाच्या गेटी मुखार आशिल्ल्या रानांत ओडेत व्हेली. मजगतीं, पिडेस्ताच्या इश्टान थंयच्यान पळ काडलो आनी हेर विशीं पुलिसांक म्हायती दिली.
उपदंडाधिकारी आणि एसडीओ दुर्गापूर रंजना रॉय हांणी पिडेस्ताची भेट घेतली. तिणें म्हणलें, विद्यार्थिनीची भलायकी स्थिर आसा. तिची आवय तिचे वांगडा आसा. पिडेस्ताच्या पालकांनी चलयेच्या इश्टाचेर आनी तिच्या इश्टाचेर हे घडणुकेंत आसपाव आशिल्लयचो आरोप केला. पिडेस्ताच्या इश्टाक ताब्यांत घेवन ताचे कडेन पुलीस चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
