भांगरभूंय | प्रतिनिधी
दोगां अनवळख्यांनी मारली धांव; पुलीस तपास सुरू
पणजी: पर्वरे पंजाब नॅशनल बँके कडल्यान 8 लाख रुपयांचें बनावट कागदपत्रां सादर करून मोटारी खातीर रीण घेतिल्ल्या दोगां अनवळख्यांनी बँकेची फटवणूक केल्ल्याची घडणूक मुखार आयल्या. ह्या प्रकरणांत पर्वरी पुलिसांनी गुन्यांव नोंद करून तपास सुरू केला.
मेळिल्ले म्हायती प्रमाण ह्या प्रकरणांत सुकूर-पर्वरे पंजाब नॅशनल बँकेचे वेवस्थापक योगेश शर्मा हांणी कागाळ दाखल केल्या. ते प्रमाण 16 नोव्हेंबर 2021 दिसा बँकेच्या सुकूर फांट्यांतल्यान 8 लाख रुपयांचें मोटारी खातीर रीण मंजूर केल्लें.
हे खातीर कर्नाटक हांगासरलो आनी पर्वरे रावपी शामंतक सुबराव कडेकोडी ह्या मनशान होंडा अमेज मोटारी खातीर रीण घेतिल्लें. ते खातीर ताची घरकान्न कविता मुनिबसवरा ही जामीन राविल्ली. कांय काळा उपरांत दुबावीत रिणाचे हप्ते भरिनाशिल्ले. उपरांत बँकेन संबंदितांची चवकशी करून सोद घेतलो तेन्ना थळाव्या नाम्यार वयल्या नांवाची व्यक्ती रावनाशिल्ल्याचें मुखार आयलें.
उपरांत बँकेन अदीक चवकशी केली तेन्ना दुबावितांनी रिणा खातीर तांचे बनावट वळखपत्र, हेर दस्तावेज तशेंच होंडा अमेज मोटारी खातीर एका शोरुमाचें बनावट कोटेशन तयार करून रीण घेतिल्लें.
दुबावितांनी स्वता शोरुमा कडल्यान गाडी घेतली आनी ताची बनावट नांवान येरादारी खात्यांत नोंदणी केली. उपरांत संबंदीत मोटार बँके कडेन घाणाक दवरिल्ल्याचो बनावट दस्तावेज तयार करून बनावट विमो प्रमाणपत्र बँकेंत दाखल करून त्या दोगांनी धांव मारिल्ल्याचें मुखार आयले उपरांत पर्वरी पुलीस स्टेशनार कागाळ दाखल केली.
हाची दखल घेवन पर्वरी पुलीस स्टेशनाचे पुलीस निरिक्षक अनंत गांवकार हांच्या मार्गदर्शना खाला पुलीस उपनिरिक्षक प्रतीक भट हांणी अनवळखी मनशां आड बनावट वळखपत्र तशेंच दस्तावेज सादर करून बँके कडल्यान मोटारी खातीर रीण घेवन फटवणूक केल्ल्या प्रकरणांत भारतीय दंड संहितेच्या विवीध कलमा खाला गुन्यांव दाखल चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
