भांगरभूंय | प्रतिनिधी
गांजे उसगांवच्या पंच वांगड्याचो आरोप, पंचायत खात्या कडेन कागाळ
भांगरभूंय । प्रतिनिधी
म्हापशें: उसगांव- पंचायतीचे सरपंच आनी सचिवान बेकायदो तरेन पंचायत बँक खात्यांतल्यान एक लाख रुपया काडले. हे पयशे काडटना संबंदितांनी हेर पंच वांगड्यांक विस्वासांत वा थाराव घेवंक नाशिल्लो. भौशीक सुटये दिसा तांणी चॅका वरवीं हे पयशे बँकेंतल्यान काडले, असो आरोप पंच मनिषा उसगांवकार हांणी केला.
बिरेस्तारा म्हापशेंच्या काँग्रेस कार्यालयांत आयोजीत पत्रकार परिशदेंत उसगांवकार उलयताली. ह्या वेळार काँग्रेसीचे सचीव विजय भिके, जिल्हो अध्यक्ष विरेंद्र शिरोडकार आनी कृष्णा नेने हाजीर आशिल्ले.
उसगांवकार हांणी सांगलें, आपत्कालीन परिस्थिती वेळार लेगीत सरपंच आनी सचिवांक इतली व्हड रक्कम बँक खात्यांतल्यान काडपाक मेळना. 7 मार्च 2023 ह्या दिसा होळये निमतान सुटी आशिल्ल्यान पंचायत कार्यालय बंद आशिल्लें. तरी लेगीत सरपंच आनी सचिवान सुटये दिसा चॅक जारी केलो आनी 21 मार्चाक पयशे काडले. त्या दोगांनीय आपल्या अधिकारांचो गेरवापर केला, असोय आरोप उसगांवकार हांणी केलो.
हे संबंदांत 27 मार्च 2023 ह्या दिसा आपणे दक्षता खातें तशेंच पंचायत संचालकां कडेन लेखी कागाळ केल्या, पूण अजून मेरेन कसलीच कारवाय जावंक ना. ताका लागून आतां आपल्याक कायद्याची मजत घेवची पडटली, अशी शिटकावणी उसगांवकार हांणी दिल्या. तशेंच हे पंचायतीचेर भलायकी मंत्री विश्वजीत राणे तशेंच भाजपाचो शेक आसा. अशें आसून लेगीत तांचे पंच हें बेकायदो तरेन लोकांच्या पयशांचो दुरुपेग करतात, अशी टिका उसगांवकार आनी विजय भिके हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
