भांगरभूंय | प्रतिनिधी
पीए सयत साथिदाराक पुलिसांनी घेतले ताब्यांत, कुडीचेर जखमो, पोस्टमार्टेम अहवालांत उक्तें
भांगरभूंय I प्रतिनिधी
म्हापशेंः भाजप फुडारी आनी टिकटॉक स्टार सोनाली फोगट (43) हिच्या मरण प्रकरणांत कुडीचो पोस्टमार्टेम जाले उपरांत हणजूण पुलिसांनी दोगां दुबावितां आड खुनाचो गुन्यांव नोंद केला. फोगट हिचो निजी सचीव आनी इश्ट सुखविंदर पाल सिंग ह्या दोगांय अाड गुन्यांव नोंद करून पुलिसांनी तांकां ताब्यांत घेतल्या.
सोनाली फोगट हिच्या कुडीचेर बिरेस्तारा दनपारां गोंय वैजकी म्हाविद्यालय आनी हॉस्पिटलांत (गोमॅकॉ) दोन वांगड्यांच्या तज्ञ दोतोरां कडल्यान पोस्टमार्टेम जालो. ह्या पोस्टमार्टेमाचें व्हिडियो चित्रीकरण जालें. फोगट हिका नेमके कित्याक लागून मरण आयलें, हे पोस्टमार्टेम अहवालांत अजून स्पश्ट करूंक ना. पूण तिच्या कुडीचेर घांय आनी जखमो आशिल्ल्याचे अहवालांत नमूद केलां. फोगट हिच्या मरणाचें नेमके कारण सोदपाक पुलिसांनी दुबावितांची खोलायेन चवकशी करपाची सुचोवणी पोस्टमार्टेम अहवालांत गोमॅकॉच्या फॉरेन्सीक विभागाचे डॉ. सुनील चिंबोळकर आनी डॉ. मंदार कंटक हांच्या पंगडान केल्या.
पोस्टमार्टेम अहवाल तशेंच मरण आयिल्ली फोगट हिचो भाव रिंकू ढाका (फतेहबाद, हरयाणा) हाच्या कागाळेच्या आदारान बिरेस्तारा दनपरां उसरां भा.दं. सं. कलम 302, 34 खाला दुबावीत सुधीर सांगवान आनी सुखविंदर पाल सिंग हांचे आड पुलिसांनी गुन्यांव दाखल केलो.
बुधवारा आनी बिरेस्तारा रातीं उसरां मेरेन दुबावीत सांगवान आनी पाल सिंग ह्या दोगांयची पुलीस खोलायेन चवकशी करताले. पूण रातीं उसरां मेरेन तांकां अटक जावंक नाशिल्ली. काल पसून हणजूण पुलीस स्टेशनांत दुबावितांची चवकशी करताले.
मंगळारा सकाळीं 8 वराच्या सुमाराक हणजूणेंतल्या सेंट अँथनी ह्या खाजगी हॉस्पिटलांत सोनाली फोगट हिका मरण आयलें उपरांत तिका हॉस्पिटलांत दाखल केल्ली. थंय दोतोरांनी तिका मरण आयिल्ल्याचे सांगिल्लें. फोगट ही दुबावितां सयत वागातोरांतल्या एका हॉटेलांत सोमारा रातीं 22 वेर आयिल्ली.
दुबावीत सुखविंदर हरयाणांतलो खण वेवसायीक
सोनाली फोगट हिचो इश्ट दुबावीत सुखविंदर पाल सिंग हो हरयाणांतलो एक खण वेवसायीक, ताची आनी उद्देजक गोपाल कांडा हांचे कडेन वेवसाया वयल्यान वळख आशिल्ली. सुखविंदराक ताच्या गांवा कडल्या लोकांनी ‘गोपाल कांडा’ अशें टोपण नांव दिलां. थंय ताका ह्याच टोपण नांवान वळखतात, अशी म्हायती ताणें पुलीस चवकशे वेळार दिली.
पोस्टमार्टेमाचे जालें व्हिडियो चित्रीकरण
फोगट हिचो भाव फिर्यादी रिंकू ढाका आनी तिच्या घरच्यांनी फोगट हिच्या कुडीचो पोस्टमार्टेम दोतोरांच्या पथका वरवीं जावचो, तशेंच हाचें व्हिडियो चित्रीकरण करचें, अशी मागणी केल्ली. ही मागणी पुलिसांनी मान्य केले उपरांत पोस्टमार्टेम प्रक्रियेक तांणी परवानगी दिल्ली. ते उपरांत बिरेस्तारा सकाळीं फोगट हिच्या कुडीचो व्हिडियो चित्रीकरणा सयत पोस्टमार्टेम जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
