भांगरभूंय | प्रतिनिधी
पणजी: घुमट मोगी ह्या एका तरणाट्या ग्रुपान गोंयांतलीं उच्च माध्यमीक विद्यालयां आनी म्हाविद्यालयांतल्या विद्यार्थ्यां खातीर अखील गोंय पांवड्यार ‘घुमट महासंगम’ ह्या घुमट आरती सर्तीचें आयोजन केलां. ह्या सर्तीचें उक्तावण कला आनी संस्कृती मंत्री गोविंद गावडे हांचे हस्तुकीं शेनवार 9 सप्टेंबर दिसा सकाळीं 9 वरांचेर राजीव कला मंदीर फोंडें हांगा जातलें.
उक्तावण सुवाळ्यांत राजदीप बिल्डराचे धनी राजेश तारकार, व्हीपीके अर्बन क्रेडीट सोसायटीचे अध्यक्ष दुर्गादास गावडे, साई बोडगेश्वर घुमट आरती मंडळाचे उपाध्यक्ष ऋषिकेश घाडी आनी राजीव कला मंदिराच्यो वांगडी सचीव स्वाती दळवी हे मानेस्त हाजीर रावतले. उक्तावण सुवाळ्या उपरांत रोखडीच घुमट आरती सर्तीक सुरवात जातली.
जैतिवंतांक पयलें इनाम 12 हजार रुपया, दुसरें 10 हजार रुपया, तिसरें आठ हजार रुपया, चवथें स हजार रुपया, पांचवें पांच हजार रुपया, जाल्यार उमेद वाडोवपी म्हूण दरेकी तीन हजारांचीं पांच इनामां भेटयतले.
तेच बरोबर उत्कृश्ट गायक, उत्कृश्ट घुमट वादक, उत्कृश्ट शमेळ वादक आनी उत्कृश्ट कांसाळें वादक हांकां दरेकी एक हजारांची वैयक्तीक इनामां भेटयतले. तशेंच दरेक इनामां बरोबर करंड आनी प्रमाणपत्रांय भेटयतले.
ज्या वांटेकार जाल्ल्या गटान आरती आनी गजर स्वता बरोवन सादर केल्यात अशा गटाक ‘द्रोणाचार्य करंड’ आनी पांच हजार रुपयांचें इनाम भेटयतले.
कांय हौशी तरणाट्यांनी ‘घुमट मोगी’ ह्या स्थापन केल्ले संस्थे वतीन राजीव कला मंदिराच्या पालवान हे सर्तीचें आयोजन केलां. आतां मेरेन 20 गटांनी नोंदणी केल्यात, आनी तांचे मदींच सर्त जातली. तरी सगल्या रसिकांनी हे सर्तीचो लाव घेवचो अशें आवाहन ‘घुमट मोगी’ हे संस्थेन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
