भांगरभूंय | प्रतिनिधी
पणजी: कला अकादमीची ४९ वी कोंकणी नाट्य सर्त २० फेब्रुवारी सावन सुरू जाता. अंदूचे सर्तींत वट्ट २० नाट्यसंस्था वांटेकार जाल्यात. ही सर्त फोंडेंच्या राजीव गांधी कला मंदिरांत सांजेवेळार ७ वरां सावन २० मार्च मेरेन चलतली. हे सर्तीच्या आयोजना खातीर राजीव कला मंदिराचे सक्रीय सहकार्य मेळ्ळां.
सर्तीचे नियोजीत कार्यावळी प्रमाण २० फेब्रुवारी दिसा श्रीसांतेरी कलामंच सत्तरी, मोर्ले- सत्तरी हे संस्थेच्या ममता पांडया हांणी बरयिल्ल्या आनी शिवप्रणव दामोदर अळवणी हांणी रुपांतरीत केल्लें ‘फुक्या सोवाय’ ह्या नाटकाच्या सादरीकरणान सुरवात जातली. २१ फेब्रुवारीक ब्रह्मदेव युवक संघ, ब्रह्मकरमळी, नगरगांव, वाळपय- सत्तरी ही संस्था संजीव रामकृष्ण बर्वे हांणी बरयिल्लें ‘आमची येसाय’ ह्या नाटकाचो प्रयोग सादर करतले. २३ फेब्रुवारीक अतुल साळवी हांणी बरयिल्लें आनी अविनाश नायक हांणी अनुवादीत केल्ल्या ‘राकस’ ह्या नाटकाचो प्रयोग वेदांत एंटटेनमेंट, वाळपय- सत्तरी ही संस्था सादर करतली. २४ फेब्रुवारीक डॉ. प्रकाश रमाकांत वझरीकार हांणी बरयिल्लें ‘घट्टाण…..कोणाचें?’ ह्या नाटकाचो प्रयोग द हावसिंग बोर्ड कॉलनी रेसिडेन्स असोसिएशन-सांखळे ही संस्था सादर करतली.
२५ फेब्रुवारीक तुळशीदास धोणशीकार हांणी बरयिल्लें ‘उठ गा देवा’ ह्या नाटकाचो प्रयोग गौरी तनय कला संघ, धोणशी, नागेशी- फोंडें ही संस्था सादर करतली. जाल्यार महेश एलकुंचवार हांणी बरयिल्लें आनी वैभव कंवळेकार हांणी अनुवादीत केल्लें ‘वासनाकांड’ हें नाटक २७ फेब्रुवारीक युथ आर्ट गबरु, कुडचडें वतीन सादर करतले.
१ मार्चाक रुद्रेश्वर पणजी ही संस्था अश्वेक देसाय हांणी बरयिल्लें ‘बॉ फेस्त’ हें नाटक सादर करतले. २ मार्चाक भरत नायक हांणी बरयिल्लें ‘युगान्त’ ह्या नाटकाचो प्रयोग श्रीओम साई दामोदर सांस्कृतीक संस्था, नवेवाडें – वास्को ही संस्था सादर करतली. ३ मार्चाक श्रीनागेश महालक्ष्मी प्रासादीक नाट्यसमाज, बांदिवडे- फोंडें हे संस्थेचे गिरीश जोशी हांणी बरयिल्लें आनी मुकेश थळी हांणी अनुवादीत केल्लें ‘फायनल ड्राफ्ट’ हें नाटक सादर जातलें.
४ मार्च दिसा रतीन रायकार/ नारायण खराडे हांणी बरयिल्लें ‘गोल’ हें नाटक श्रीशिव चिदंबर सांस्कृतीक आनी कला मंडळ, कुडणें- साखळे ही संस्था सादर करतली. ५ मार्चाक वसंत कामत हांणी बरयिल्लें आनी रवींद्र आमोणकार हांणी अणकार केल्लें ‘हॅप्स् अप्’ हें नाटक कण्व क्रियेशन, श्रीस्थळ – काणकोण ही संस्था सादर करतली. ६ मार्च दिसा पहाट, गांवडोंगरी- काणकोण ही संस्था प्रशांत दळवी हांणी बरयिल्लें आनी सारंग प्रभू अग्रासनी हांणी अणकारीत केल्लें ‘अनकन्डीशनल लव्ह’ ह्या नाटकाचो प्रयोग सादर करपाचे आशिल्ल्यान श्रीदेवी भगवती स्पोर्ट्स ऍण्ड कल्चरल मंडळ, पेडणें हे संस्थे वरवीं अविनाश च्यारी हांणी बरयिल्लें ‘आमचां कुळ’ हें नाटक ७ मार्चाक जातलें. १० मार्चाक अभय थिएटर अकादमी, पाळी, सुर्ला हे संस्थे वतीन रत्नाकर मतकरी हांणी बरयिल्लें आनी मिलिंद बर्वे हांणी अनुवादीत केल्लें ‘ज्यूरर्स’ हें नाटक सादर जातलें.
११ मार्चाक दारियो फो हांणी बरयिल्लें आनी वसंत भगवंत सावंत हांणी अणकार केल्लें ‘बे- रंगारी’ ह्या नाटकाचो प्रयोग राजहंस क्लब, पणजी – ही संस्था सादर करतली. मुष्टिफंड संस्था, पणजी हे संस्थे वतीन पुंडलीक नारायण नायक हांणी बरयिल्लें ‘सुरींग’हें नाटक १२ मार्चाक जातलें. १७ मार्चाक हेन्रीक इब्सन हांणी बरयिल्लें आनी ओलिव्हिन्यु गोमिश् हांणी अनुवादीत केल्लें ‘लांवां-भुतां’ हें नाटक ॐ कलासृष्टी, बांदोडें-फोंडे ही संस्था सादर करतली. १८ मार्चाक अंत्रुज घुडयो, बांदोडें – फोंडें ही संस्था दत्ताराम कामत बांबोळकार हांणी बरयिल्लें ‘डॅडी’ हें नाटक सादर करतली. सत्यम शिवम सुंदरम नाटय संपदा, भोमा- फोंडें ही संस्था वैभव कवळेंकार हांणी बरयिल्लें ‘द इन्सिडियस’ हें नाटक १९ मार्चाक जातलें. जाल्यार २० मार्चाक सर्तीचो समारोप कला अविष्कार, मासोड्डें, वाळपय हे संस्थेचे डॉ. प्रकाश रमाकांत वझरीकार हांणी बरयिल्ल्या ‘साद अंतर मनाचो’ ह्या नाटकान जातलो.
सर्तींतले सगळे नाट्य प्रयोग सद्दां सांजेवेळार ७ वरांचेर फोंडेंच्या राजीव गांधी कला मंदिरांत जातले. रु. १०० च्यो प्रवेशिका नाट्यप्रयोगाचे सुवातेर तिकीट कावंटराचेर मेळटल्यो. हाची संबंदीतांनी नोंद घेवची अशें कला अकादमीन कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
