भांगरभूंय | प्रतिनिधी
फोंडें, प्रतिनिधी: निरंकालो दूदसागर न्हंयेच्या उदकाची पातळी वाडिल्ल्यान आयतारा सकाळीं रस्तो उदका पोंदाक गेल्ल्यान दाबाळ – फोंडेंच्या रस्त्यावेली येरादारी बंद जाल्या. तशेंच देऊळमळ – साकोड्डेंच्या पुलार तशेंच दावकोण- धारबांदोडेंचो रस्तो उदकां पोंदा गेल्ल्यान ताचो परिणाम हांगच्या लोकांचेर जाल्लो दिसता.
बेतोडें पंचायत वाठारांतल्या निरंकाल हांगा फाटल्या आयतारा उदका पोंदाक गेल्लो रस्तो परत परत उदकाची पातळ वाडिल्ल्यान हांगची येरादारी ठप्प जाली. ह्या मार्गान व्हडा प्रमाणांत वाहनां फोड्यां वतात. रस्तो उदका पोंदा गेल्ल्यान येरादारी धारबांदोडेंच्या रस्त्यान वळयल्या.
दावकोणाय आयतारा सकाळीं रस्तो उदका पोंदा गेल्ल्यान लोकांक रानांतल्यान यो-वच करचें पडलें. हे विशीं म्हायती मेळटांच स्थितीचेर लक्ष दवरपाक कुळें पुलीस स्टेशनाचे निरीक्षक सगुण सावंत हांणी रोखडेच थंय कर्मचारी तैनात केले. गांवांतल्या कांय घरांनी उदक घुसपाची शक्यताय आशिल्ल्यान थळाव्यांक पुलिसांनी शिटूक रावपाची शिटकावणी दिल्या. तशेंच देऊळवाड्यारूय रगाडा न्हंयेच्या उदकाची पातळी वाडिल्ल्यान पूल उदका पोंदा गेला. ताका लागून ह्या रस्त्यावेली येरादारी बाराभुमी हांगच्यान वळयल्या. आयतारा सांजेवेळार मेरेन हे स्थितीचेर लक्ष दवरपा खातीर कुळें पुलीस तैनात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
