भांगरभूंय | प्रतिनिधी
कान दुखूंक लागिल्ल्यान प्रकार आयलो उक्ताडार
फोंडें: कुर्टी हायस्कुलांतल्या धावेच्या वर्गातल्या एका विद्यार्थ्याक मारपेट केल्ल्या प्रकरणांत फोंडें पुलिसांनी हायस्कुलाचे अध्यक्ष अफजल मुल्ला हाचे आड गुन्यांव नोंद केला. 22 ऑगस्ट दिसा दनपारां 12.45 वरांचेर ही घडणूक घडिल्ली. काल (बिरेस्तारा) विद्यार्थ्याचो कान दुखूंक लागिल्ल्यान हो प्रकार उक्ताडार आयले उपरांत पालकांनी रितसर पुलीस कागाळ केली.
फोंडें पुलिसांनी दिल्ले म्हायती प्रमाण, काल सकाळीं एका विद्यार्थ्याचो कान दुखूंक लागलो. त्या वेळार पालकांनी ताका उपचारा खातीर दोतोरा कडेन व्हेलो तेन्ना 22 ऑगस्ट दिसा वट्ट तीन विद्यार्थ्यांक मारपेट केल्ल्याचें उक्ताडार आयलें. पूण ते संबंदी एकाय विद्यार्थ्यान आपल्या पालकांक हाची म्हायती दिवंक नाशिल्ली. काल एका पालकाच्या लक्षांत हो प्रकार आयले उपरांत फोंडें पुलीस स्टेशनार हायस्कुलाच्या अध्यक्षा आड गुन्यांव नोंद केलो. ह्या प्रकरणांत फोंडें पुलीस स्टेशनाचे निरिक्षक विजयकुमार चोडणकार अदीक तपास करतात.
22 ऑगस्ट दिसा हायस्कुलांत वर्ग सुरू आसतना अचकीत दनपारां संस्थेचे अध्यक्ष अफजल मुल्ला दाखल जाले. त्या वेळार विद्यार्थी पुस्तकां घरा विसरून आयिल्ल्याचें उक्ताडार आयिल्लें. तिडकी भितर अध्यक्षान दोगां विद्यार्थ्यांक मारपेट केली. पूण वर्गांत वता आसतना आनीक एका विद्यार्थ्याच्या कानार अध्यक्षान थापट मारलें. त्या वेळार विद्यार्थ्याच्या कानांतल्यान रगत व्हांवूंक लागलें. कांय वेळान कानांतल्यान येवपी रगत थांबिल्ल्यान विद्यार्थ्यान ते गजाली संबंदी कोणाकूच कल्पना दिवंक नाशिल्ली.
सद्या चवथीची सुटी आशिल्ल्यान सगले विद्यार्थी आपआपल्या घरा आशिल्ले. काल सकाळीं कानार थापट मारिल्ल्या विद्यार्थ्याच्या कानांत दुखूंक लागलें. कान चड दुखूंक लागिल्ल्यान पालकांनी आपल्या चल्याक फोंडें वाठारांतल्या एका दोतोरा कडेन व्हेलो. त्या वेळार चल्यान हायस्कुलांत घडिल्लो प्रकार सांगले उपरांत पालकांक धक्कोच बसलो. हे संबंदी पालकांनी पुलीस निरिक्षक विजयकुमार चोडणकार हांचे कडेन चर्चा केले उपरांत रितसर पुलीस कागाळ केली.
हे संबंदी पुलिसांनी दुबावीत अफजल मुल्ला हाचे आड गुन्यांव नोंद केला. पूण अजून मेरेन हेर दोन पालकांनी अध्यक्षान मारपेट केल्ल्याची कागाळ पुलीस स्टेशनार दिल्ली ना. निरिक्षक विजयकुमार चोडणकार हांणी हे संबंदी हायस्कुलाचे अध्यक्ष अफजल मुल्ला हाचे आड गुन्यांव नोंद केल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
