भांगरभूंय | प्रतिनिधी
फोंडें, प्रतिनिधी : फाटल्या कांय म्हयन्यां सावन फोंडें म्हालांत आंदोलनाक लागून फोंडें पुलिसांची बरीच धांवपळ जाल्या. उंडीर- बांदोडेंच्या गटार प्रकल्प आनी मुर्डी – खांडेपारा दुदसागर न्हंयेचेर उबारपी बांदाक ग्रामस्थ विरोध करतात. उण्या कर्मचार्यांक लागून पुलीस अधिकार्यांक बरेच त्रास जाल्ल्यान ह्या पुलीस स्टेशनांत हवालदार, सहाय्यक उपनिरीक्षक आनी उपनिरीक्षकांची नियुक्ती करपाची गरज आसा.
म्हाड्डोळा नवें पुलीस स्टेशन सुरु जाले उपरांत फोंडें पुलीस स्टेशनाच्या कर्मचार्यांचेर कामाचो ताण उणो जाला तरी उण्या कर्मचारी वर्गाक लागून तपास कामाक आडखळ निर्माण जाता. तातूंत मुर्डी- खांडेपारा जमावबंदी लागू करून बांदाच्या कामाक सुरुवात जाल्या. ताका लागून फाटल्या कांय दिसां सावन कितलेशेच पुलीस कर्मचारी मुर्डी वाठारांत दवरल्यात. तशेंच उंडीर – बांदोड्यां गडार प्रकल्प उबारपाच्या कामाक सुरवात करपाचो यत्न जाल्ल्यान ग्रामस्था अदीं मदीं एकठांय जावन प्रकल्पाक विरोध करतात. ताका लागून परत परत ग्रामस्थ रस्त्यार देंविल्ल्यान पुलिसांचे सध्या हाल जातात.
फोंडें पुलीस स्टेशनाचे हद्दींत येवपी 21 पंचायतीं मदल्यो 9 पंचायती सध्या म्हाड्डोळ पुलीस स्टेशनाच्या हद्दींत येता. तरीय हांगां उपनिरीक्षक, सहाय्यक उपनिरीक्षक आनी हवालदार हांचो उणाव दिसून येता. अधिकार्यांक परत परत बंदोबस्ताक वचपाचें पडिल्ल्यान गुन्यांवांचो सोद घेवपाक वेळ मेळना. उण्या कर्मचार्यांक लागून वरिश्ठ अधिकार्यांक बरेच त्रास सोंसचे पडटात. तातूंत शारांतले सीसी टीव्ही कॅमेरे एक वस्तू जावन पडिल्ल्यान पुलिसांक तपास करपाक आडखळ निर्माण जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
