फोंडें पालिका वेंचणुकेंत देरा आड भावजय

भांगरभूंय | प्रतिनिधी

उमेदवारी अर्ज दाखल करून सगल्यांकूच दिलो धपको

फोंडें: फोंडें पालिकेचे वेंचणुके खातीर प्रभाग चारांतल्यान सेगीत तीन फावटी जैतिवंत जाल्ले व्यंकटेश उर्फ दादा नायक हांचे आड तांची भावजय चंद्रकला नायक हांणी उमेदवारी अर्ज दाखल करून सगल्यांकूच धपको दिला. काल (बिरेस्तारा) देर आनी भावजय हांचे सयत प्रभाग 12 तल्यान शिवानंद सावंत, प्रभाग 3 रेवा फर्नांडीस, प्रभाग 2 विरेंद्र ढवळीकार, प्रभाग 1 ज्योती कुलकर्णी हांणी उमेदवारी अर्ज दाखल केल्यात.

उमेदवारी अर्ज दाखल करपाच्या चवथ्या दिसा वट्ट 6 उमेदवारी अर्ज निर्वाचन अधिकाऱ्या कडेन सुपूर्द केल्यात. हातूंत प्रभाग 4 तल्यान वेंचणूक लढोवपी चंद्रकला नायक हांणी आपलो देर व्यंटेश नायक हाचे आड अर्ज दाखल केला.

फोंडें पालिकेंत सेगीत म्हत्वाची भुमिका वठोवपी व्यंकटेश नायक फाटल्या तीन वेंचणुकांनी जैतिवंत जाल्यात. फाटले पालिका वेंचणुकेंत प्रभाग चार हो बायलां खातीर आरक्षीत जाल्ल्यान व्यंकटेश नायक हांणी आपली भावजय चंद्रकला नायक हिका जैतिवंत करपा खातीर म्हत्वाचें योगदान दिल्लें. पूण फाटल्या वर्सभरांत चंद्रकला नायक आनी व्यंकटेश नायक हांचे मदीं कांय प्रमाणांत दुरावो निर्माण जाल्लो. निमाणें 5 मे दिसा जावपी पालिका वेंचणुकेंत चंद्रकला नायक हांणी आपलो देर व्यंकटेश नायक हांचे आड उमेदवारी अर्ज दाखल करून सगल्यांकचो धपको दिला.

प्रभाग 12 तल्यान उमेदवारी अर्ज दाखल केल्ले आदले नगरसेवक शिवानंद सावंत हांणी परतून वेंचणूक लढोवपाचो निर्णय घेतला. फाटले वेंचणुकेंत आपली घरकान्न जया सावंत हांकां प्रभागांत जैतिवंत केल्ले. प्रभागांत स्वताची म्होर उमठावपी शिवानंद सावंत ह्या वेळार परतून जैतिवंत जावपाचे तयारेंत आसात.

आदले नगरसेवक विरेंद्र ढवळीकार हांणी परतून प्रभाग 12 तल्यान उमेदवारी अर्ज दाखल केला. ह्या वेळार तांचे सयत फोंडें भाजपा मंडळाचे अध्यक्ष तशेंच आदले नगरध्यक्ष विश्वनाथ दळवी हाजीर आशिल्ले. तशेंच रेवा फर्नांडीस, ज्योती कुलकर्णी हांणी आपले अर्ज बिरेस्तारा दाखल केल्यात. 18 एप्रील हो उमेदवारी अर्ज दाखल करपाचो निमाणो दीस आसा.

फोंडें पालिका वेंचणुके संबंदी वीज मंत्री सुदिन ढवळीकार हांकां विचारलें तेन्ना पालिका वेंचणुको पक्षीय पांवड्यार जायनात. ताका लागून विवीध पक्षाचे कार्यकर्ते आपले मर्जी प्रमाण वेंचणूक लढयतात. मगो पक्षाचे कांय कार्यकर्ते लेगीत पालिका वेंचणूक लढयतात. फाटले फावटी मगो पक्षान तेंको दिल्ले 7 नगरसेवक जाल्यार काँग्रेसीचे 3 नगरसेवक जैतिवंत जाल्लें अशें तांणी सांगलें.