भांगरभूंय | प्रतिनिधी
सरकारांत 4 मंत्री आसुनूय अविस्वास, भाजपाक धपको
फोंडेंः फोंडें पालिकेचे नगराध्यक्ष रितेश नायक हांचे आड 15 नगरसेवकांतल्यान 8 नगरसेवकांनी अविस्वास थाराव दाखल केल्ल्यान भाजपाक व्हड धपको बसलो. नगरसेवक व्यंकटेश उर्फ दादा नायक, शांताराम कोलवेंकार, विलियम आगियार, अमिना नायक, प्रदीप नायक, सीमा फर्नांडीस, गिताली तळावलीकार आनी जया सावंत हांणी अविस्वास थारावाचेर सयो केल्यात.
अचकींत घडिल्ल्या नाट्यमय घडामोडी विशीं फोंड्यांत चर्चेचो विशय थारला.
फाटल्या कांय दिसां पसून पालिकेचे बसके वेळार नगरसेवक व्यंकटेश नायक आनी नगराध्यक्ष रितेश नायक हांचे मदीं विवीध प्रस्नांचेर एकमत जायनाशिल्ले. ते एकामेकांचेर अारोप-प्रत्यारोप करताले. ताका लागुनूच नगराध्यक्ष आड अविस्वास थाराव दाखल जाल्ल्याचो दुबाव उक्तायतात.
फोंडें म्हालांत 4 आमदार सध्या भाजप सरकारांत मंत्री म्हूण कार्यरत आसा. हातूंत नगराध्यक्ष रितेश नायक हांचो बापूय रवी नायक हे कृशी मंत्री आसात. अचकींत घडिल्ल्या ह्या घडामोडीक लागून भाजपांतले जायते फुडारी अजाप उक्तायतात. कारण वेंचणुके पयलीं दाखल जाल्ल्या अविस्वास थारावाक लागून भाजपा खातीर हो व्हड धपको मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
