भांगरभूंय | प्रतिनिधी
बाणस्तारी अपघात थारलो वादग्रस्त
म्हाड्डोळ पुलीस स्टेशन अदीक चर्चेंत
फोंडें: फोंडें म्हालांत फोंडें आनी म्हाड्डोळ आनी धारबांदोडें म्हालांतलें कुळें पुलीस स्टेशनार मेळून 2023 वर्सा वट्ट 29 जाणांक अपघातांत मरण आयिल्ल्याची नोंद जाल्या. हातूंत म्हाड्डोळ पुलीस स्टेशनाचे हद्दींत बाणस्तारे मर्सडीज मोटार अपघात वादग्रस्त थारिल्लो. बाणस्तारी अपघाताक लागून नव्यान सुरू जाल्लें म्हाड्डोळ पुलीस स्टेशन अदीक चर्चेंत आयलें.
फोंडें पुलीस स्टेशनाचे हद्दींत वर्सभरांत सगल्यांत चड 19 अपघाती मरणाची नोंद जाली. तशेंच म्हाड्डोळा 7 आनी कुळें पुलीस स्टेशनार 3 अपघाती मरणाची नोंद जाल्या. म्हाड्डोळ पुलीस स्टेशनार बाणस्तारी पुलार जाल्लो अपघात वादग्रस्त थारलो. अपघातांत मर्सडीज मोटार चालकान वट्ट तिगांचो बळी घेतलो. अपघाता वेळार चालकाच्या सिटार बायल दिसून आयले उपरांत चालका विशीं गोंदळ निर्माण जाल्लो. हे खातीर लोकांनी पुलीस स्टेशनार मोर्चा लेगीत काडिल्लो.
बाणस्तारी अपघाता उपरांत हेर गुन्यांवांची नोंद पुलीस स्टेशनार जाली. हातूंत 2 बलात्कार, एक खून, झाड पडून आवय आनी भुरग्याक मरण, एक विनयभंग आनी हेर गुन्यांव पुलीस स्टेशनार नोंद जाल्यात. 2023 वर्सा म्हालांत म्हाड्डोळ पुलीस स्टेशन चडशें चर्चेंत उरलें. कारण पुलीस स्टेशनार 7 म्हयन्यांत 3 पुलीस निरिक्षकांनी ताबो घेवन विक्रमूच केला.
फाटल्या कांय वर्सां सावन फोंडें पुलीस स्टेशनाचे हद्दींत येवपी उसगांव पंचायत वाठारांत आत्महत्येच्या प्रमाणांत वाड दिसून येता. वाठारांत उद्देगीक वसणूक आशिल्ल्यान व्हड प्रमाणांत गोंया भायले लोक राबित्याक आसात. बेकारी आनी वाडट्या तणावाक लागून खूबशे गोंया भायले लोक ह्या वाठारांत आत्महत्या करपाक प्रवृत्त जायत आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
