भांगरभूंय | प्रतिनिधी
फोंडें, प्रतिनिधी: फोंडें शारांतले येरादारीचेर नदर दवरपा खातीर कांय वर्सां आदीं बसयल्लो तिसरो दोळो म्हळ्यार सीसी टीव्ही कॅमेरा फाटल्या कितल्याशाच वर्सां सावन बंद अवस्थेंत आसा. विवीध भागांत बसयल्ल्या सीसी कॅमेर्यांची वेळार दुरुस्ती जावंक नाशिल्ल्यान सगळे कॅमेरे सध्या सोबेची वस्तू जावन पडल्या. एखादो गुन्यांव घडले उपरांत पुलिसांक म्हत्वाचे पुरावे सोदपा खातीर सीसी टीव्ही कॅमेरे म्हत्वाचे आसतात. मात, शारांतले सीसी टीव्ही कॅमेरे बंद आशिल्ल्यान पुलिसांक गुन्यांवकारां मेरेन पावपा खातीर खाजगी दुकानांतल्या कॅमेर्यांचो आदार घेवचो पडटा. ताका लागून शारांत गरजेच्या सुवातांचे बेगोबेग सीसी टिव्ही कॅमेरे बसोवपाची लोक करतात.
फोंडें शारांत कांय वर्सां आदीं दक्षीण गोंयचे आदले खासदार नरेंद्र सावयकार हांणी खासदार निधींतल्यान वट्ट २२ सीसी कॅमेरे बसयल्ले. सीसी कॅमेर्यांची जतनाय घेवपाची जापसालदारकी एके खाजगी एजन्सीक दिल्ली. मात ते एजन्सीन कॅमेर्यांचो सांबाळ वेवस्थीत करूंक नाशिल्ल्यान सगळे सीसी टिव्ही कॅमेरे कांय वर्सांनी बंद पडिल्ले. शारांत सीसी कॅमेरे नाशिल्ल्यान जायते फावट गुन्यांव घडले उपरांत पुलिसांक खाजगी दुकानांतले सीसी कॅमेर्यांचेर निंबून रावचें पडटा.
शारांतले येरादारीचेर लक्ष दवरपा खातीर हे सिसीटीव्ही कॅमेरे उपेगी पडटाले. येरादारी नेम पाळिनाशिल्ल्या वाहन चालकांचेर सीसी कॅमेर्यांचे मजतीन दंडात्मक कारवाय पुलीस करताले. मात सगळे कॅमेरे बंद पडिल्ल्यान पुलिसांक रस्त्यार रावन दंडात्मक कारवाय करची पडटा. फोंडें शारांत वाडपी वाहनांची गर्दी आनी गुन्यांव लक्षांत घेवन सीसी टिव्ही कॅमेरेन काळाची गरज जावन पडल्या. ताका लागून सरकारान हे विशीं दखल घेवन बेगोबेग सीसी टीव्ही कॅमेरे बसोवपाची मागणी थळावे लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
