भांगरभूंय | प्रतिनिधी
भांगरभूंय I प्रतिनिधी
पणजी : रस्ते तयार केले उपरांत फुडली कांय वर्सां देखभाल आनी दुरुस्तीची जापसालदारकी ज्या कंत्राटदारांनी घेतिल्ली तांकांच तांणी केल्ल्या रस्त्या वयलीं फोंडकुलां पुरोवपाचो खर्च करचो पडटलो, अशा कंत्राटदारांक ‘जेट पॅचर’ मशीन वरवीं फोंडकुलां पुरोवपाचें पयशे फारीक करचे पडटले, भौशीक बांदकाम खात्याचे मंत्री निलेश काब्राल हांणी मंगळारा पत्रकारां कडेन उलयतना स्पश्ट केले.
राज्यांतल्या विवीध वाठारांतल्या रस्त्यांचेर पडिल्लीं फोंडकुलां पुरोवपाचें काम दोनूय जिल्ह्यांनी सुरू आसा. संबंदींत रस्ते तयार केले उपरांत फुडलीं कांय वर्सां रस्त्यांची देखभाल आनी दुरुस्तीची जापसालदारकी रस्ते तयार करपी कंत्राटदारांनी घेतिल्ली. कांय रस्त्यांचेर पयल्याच पावसांत फोंडकुलां पडलीं. अशी फोंडकुलां ‘जेट पॅचर’ मशीन वरवीं पुरोवपाचें काम पीडब्ल्यूडीन फाटल्या कांय दिसां पसून सुरू केलां. ह्या कामाचो खर्च सरकारी तिजोरेंतल्यान करतले. उपरांत रस्ते तयार केल्ल्या कंत्राटदारांक ह्या कामाचें पयशे फारीक करचे पडटले. तशें निर्देश सरकारान तांकां दिल्यात, अशें मंत्री काब्राल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
