फॉरवर्डान म्हूर्त काडलो, हेरांचें कितें?

भांगरभूंय | प्रतिनिधी

वेंचणूक जावन तीन वर्सां लोकां मदल्यान पळ काडून खंय तरी एकांतात वाडदीस मनोवप आनी वेंचणुको लागीं आयल्यो की…

राजकी फुडारी आपलो वाडदीस व्हड दबाज्यान मनोवंक लागले की समजुचें वेंचणुको लागीं पावल्यात. राजकी फुडाऱ्यांचे वाडदीस आनी वेंचणुको हें समीकरण तशें लोकां खातीर नवें न्हय. वेंचणूक जावन तीन वर्सां लोकां मदल्यान पळ काडून खंय तरी एकांतात वाडदीस मनोवप आनी वेंचणुको लागीं आयल्यो की आपूण लोकां मदलोच एक आसा हें दाखोवन दिवपा खातीर लोकांच्या सहभागान व्हड दबाज्यान वाडदीस मनोवप ह्यो आतां लोकां खातीर नव्यो गजाली उरिल्ल्यो नात.
पयर शेनवारा गोवा फॉरवर्ड पक्षाचे सर्वेसर्वा, आदले उपमुख्यमंत्री आनी फातोड्डेंचे आमदार विजय सरदेसाय, आनी आयतारा दिवचलचे आमदार नरेश सावळ हांणी आपापलो वाडदीस असोच व्हड दबाज्यान मनयलो, आनी राज्य विधानसभेच्यो वेंचणुको वर्स देड वर्सांचेर येवन पाविल्ल्याची यादूच एके तरेन करून दिली. नरेश सावळ हांच्या वाडदीस सुवाळ्याक जाल्यार तांच्या षष्ठयब्दीपुर्तीचेंय वलय प्राप्त जाल्लें. कुमारजुंवें मतदारसंघांतूय सिद्धेश श्रीपाद नायक हेवूय वाडदिसा निमतान लोकां मुखार आयिल्ले दिसले. मुख्यमंत्र्या सयत खूबशे फुडारी तांकां सदिच्छा दिवपा खातीर थंय हाजीर आशिल्ले. फुडल्या वर्स देड वर्सांत अशें चित्र गोंयांतल्या सगल्याच मतदारसंघांनी हमखास दिसतलें आनी ताका कोणेय आक्षेप घेवपाचें कारण ना. मंत्री, आमदार आनी हेर राजकी फुडाऱ्यां खातीर होच तर एक पर्याय आसता, परतून लोकां मदीं वचून तांचे मदीं मिसळपाचो आनी त्याच आदाराचेर आपलें घोडें मुखार व्हरपाचो हो एक पर्याय.
गोंयच्या राजकी मळार सत्ताधारी भारतीय जनता पक्षाचीच सद्या धामधूम सुरू आसतना येता ती विधानसभा वेंचणूक दोळ्या मुखार दवरून वाडदिसाचें निमित्त करून जायना, विरोधी पक्षांच्यो हालचाली सुरू जाल्यात ही एका अर्थान निश्चीतच सकारात्मक गजाल आसा. 2022ची विधानसभा वेंचणूक जायत सावन फाटलीं तीन वर्सां अशे दबाज्यान राजकी फुडाऱ्यांनी मनयिल्ले वाडदीस आमी अपवादानूच पळयिल्ले आसतले. पूण आतां लोकांचे बरे दीस सुरू जाल्यात अशें म्हणल्यार चुकीचें थारचें न्हय. गोंय राज्य विधानसभे खातीर 2027च्या पुर्वार्धात वेंचणुको जावपाच्यो आशिल्ल्यान ह्या ल्हानशा राज्यांतलें राजकी वातावरण धवळून वचपाची ही तर सुरवात आसा अशें आमी निदान म्हणूंक शकतात. गोवा फॉरवर्डाचे विजय सरदेसाय हांचे डावपेंच हातूंतल्यान समजूंक शकतात. तांणी घोग्यांनी पडत आशिल्ल्या पावसांतूय म्हूर्त काडून आपली वा तांच्या पक्षाची फुडली वाटचाल सुमार कशी आसतली हें जाहीर लेगीत करून उडयलें. विजय सरदेसाय हांची आक्रमकताय तांकां सुसेगादीन बसूंक दिना हें ह्या निमतान परतून एकदां दिसून आयलें. काँग्रेसी सयत हेर विरोधी पक्षांक तांणी एके तरेन आतांच जागे जायात अशीच कितें तरी शिटकावणी वा संदेशूच दिला. गोवा फॉरवर्डान आपलो म्हूर्त काडलो, पूण हेर राजकी पक्षांचें कितें हो प्रस्न ते खातिरूच विचारचो अशें दिसता. ‘इंडी’ आघाडी गोंयांत अस्तित्वांत आशिल्ल्याचें मानीत आसलें तरी चडशे सगलेच पक्ष एकामेका पसून व्हड अंतर दवरून आसात, की विजय सरदेसाय हांकां जें अपेक्षीत आसा तें प्रत्यक्षांत देंवूंक शकतलें काय कितें हे विशीं दुबाव दिसुये.
भारतीय जनता पक्षाच्या ल्हारांत मोट्या मोट्या राज्यांनी विरोधी पक्ष व्हांवून गेल्ले आसतना गोंयांत विरोधक भाजपाक आडावंक शकतले? होवूय प्रस्न आयज विचारतात. विजय सरदेसाय हांकांय तोच हुस्को भेडसायता आसुये. तांकां दिसपी हुस्को समजुपा सारकोच आसा. ताका लागून येता ते वेंचणुके मेरेनच्या वर्स देड वर्सांच्या काळांत सगल्यांनी तत्काळ एकठांय येवचें अशें ते उलोवन दाखयतात आनी वेळ पडल्यार ताचें फुडारपण करपाचीय तयारी अप्रत्यक्षरितीन का जायना ते दाखयत आशिल्ल्याचें दिसता. गोवा फॉरवर्डान काडिल्लो म्हूर्त तशें पळोवंक गेल्यार सामको योग्य असोच आसा, आनी तातूंतल्यान काँग्रेस, आरजी, आम आदमी आदीं इश्ट पक्षांक जागोवपाचें काम तांणी एके तरेन केलां. भारतीय जनता पक्षाक गोंयच्यान सत्ते पसून पयस करपाचे दिकेन विजय सरदेसाय आनी तांच्या गोवा फॉरवर्ड पक्षान पयलें पावल जाल्यार वाडदिसाचो म्हूर्त सादून उडयलां. पूण ते खातीर फुडले वाटचालीक तांकां कोण आनी कसो सांगात दितलो हाचेर खूबशें निंबून आसा. विजय सरदेसाय हे धाडशी फुडारी हातूंत वाद ना. दरेक वक्त्यान तांचे विशीं केल्ली तोखणाय ही तांच्या आतां मेरेनच्या राजकी प्रवासाचो विचार करीत जाल्यार अतिशयोक्ती आशिल्ल्याचें म्हणूंक येवचें ना, पूण निमाणें मेरेन हो सांगात तिगून उरतलो काय कितें होच मोटो प्रस्न आसा. फुडल्या वर्स देड वर्सांतल्या राजकी प्रवासांत अशीं खूबशीं मोडणां, चडटी-देंवती येतली. त्या वेळारूय हो सांगात तिगून उरलो जाल्यार घेतिल्ले कश्ट फळादीक आयले अशें म्हणूंक येतलें.
विजय सरदेसाय हांचो 2022चे वेंचणुकेचो अणभव तसो बरो ना. आतां जाल्यार तांकां काँग्रेसी सयत सगल्यांचोच सांगात जाय. म्हुर्ताचे कार्यावळींत तांचे सयत दयानंद मांद्रेंकार, नरेश सावळ, किरण कांदोळकार, जुझे फिलीप बी राजकी सर्तींत फाटीं पडिल्ले खूबशे जाण दिसले. आनी ताका लागून विजय सरदेसाय हांणी केल्ले पुर्वतयारेची कल्पना खूबशा जाणांक आयली आसुये. गोंयचो भाजप सद्या मोदी सरकाराचीं इकरा वर्सां मनोवपांत गुल्ल आसलो तरी वट्ट राजकी परिस्थितीचें पुराय भान तांकां आसा. 27त 27 सुवातो हो तांचो मंत्र आसा आनी तांकां शह दिवपाचो आसत जाल्यार विरोधकांक एखादो राजकी चमत्कारूच करून दाखोवचो पडटलो. हें आव्हान विजय सरदेसाय हांकां पेलतलें? राजकी खुमखुमी तर खूब आसा. पूण राजकारणांत दोन अदीक दोनची जाप केन्नाच चार नासता हाचेंय भान तांकां दवरचें पडटलें. सगल्यांत पोरणो काँग्रेस पक्ष न्हिदला. ताका जाग येवंक जाय अशेंय ते म्हणटात तें चुकीचें न्हय. मागीर तांकां जागयतलो कोण? हें काम विजय सरदेसाय हांकांच तें करचें पडटलें. काँग्रेसीची सद्याची हांगासरली स्थिती वायटूच आसा. पूण वास्तव स्विकारून मुखार येत जाल्यार ती काँग्रेस कसली? आरजीन वेगळी चूल मांडपाचो निश्चेव केला. आम आदमी पक्षाचें काँग्रेसी कडेन पट्टलें अशें म्हणपाचें धाडस आयज कोण करचो ना. राष्ट्रवादी कडल्यान तर कसलीच अपेक्षा करूंक येवची ना. अशे फाटभुंयेर विजय सरदेसाय हांणी राजकी शिवधोनू उबारपाचो जो निश्चेव केला ते खातीर तांकां मानूंक जाय. गोंयांतल्यो येता त्यो वेंचणुको निदान अटीतटीच्यो जाल्यो तरी तांचे तें खूब व्हड येस
थारतलें.

वामन प्रभू
9823196359