भांगरभूंय | प्रतिनिधी
विदेशांत कांय राष्ट्रांनी अस्थीरताय, थोड्या राष्ट्रांत मंदी आसा. वर्सांचीं वर्सां सत्तेर आशिल्ल्या राष्ट्रीय फुडाऱ्यांक मारपाचे, सत्ते वेल्यान देंवोवपाचे येत्नय जातात. आमच्या देशाक भारताक श्रीलंकेचे वाटेन वच्चें पडटलें अशी शिटकावणी दिल्लीचे मुख्यमंत्री अरविंद केजरीवाल हांणी दिल्या. खरेंच भारताचो फुडार तसो आसत व्हय? तशें जावपाचें आसल्यार ती हुस्क्याची गजाल, पूण भारताचें अर्थकारण प्रधानमंत्री नरेंद्र मोदी हांणी अर्थमंत्री निर्मला सितारमण हांचे वरी कणखर अस्तुरे कडेन दिलां.
मॅडम निर्मला ही अश्टतासांची अस्तुरी. भाजपाक मोदीजींच्या फुडारपणा खाला सत्तेर हाडपाचे तयारे खातीर जेन्ना गोंयांत भाजपाची राष्ट्रीय कार्यकारिणी बसका गोंयांत 2013 वर्सा जाल्ली. तेन्ना देश – विदेशांतल्या मिडियाक भितरली, भायली अचूक माहिती दिवपाचें काम उपराष्ट्रपती व्यंकय्या नायडू, आदले केंद्रीय मंत्री रवीशंकर प्रसाद, मुख्तार अब्बास नकवी, प्रकाश जावडेकर, स. अरुण जेटली हांचे बराबरीन करपी निर्मला ही एकसुरी अस्तुरी आशिल्ली. आदली संरक्षणमंत्री सुषमा स्वराज हांचे फाटल्यान मॅडम निर्मला हांणी केंद्र सरकारांत उंचेलें पद सांबाळ्ळां. आज संसदीय, असंसदीय भाशेचो खवदळ चल्ला तेन्ना आपल्या खणखणीत आवाजांत जाय तितलेंच उलोवपी, उतरांचो खेळय सांबाळून करपी आनी हांसत हांसत थोमणे मारपी अस्तुरी म्हणून निर्मला हांची देख हेर फुडाऱ्यांनी घेवपा सारकी. निर्मला हांचे वरी अस्तुरी भाजपाक फुडारांत कोण मेळत खबर ना, पूण स. सुषमाजीं वरी तांचो वावर यादींत उरतलो अशें दिसता. कोविडा वेळार राज्यांक फाव ती मजत तांणी केली, पूण आतां तांणी स्वयंपूर्णते कडेन वचपाचे निर्देश दिवंक आरंभ केला. तांकां कायद्याचें, संसदेंतल्या वावराचें गिन्यान अभ्यास, उंचेलें शिक्षण आशिल्ल्यान त्योच संसदेंत, संसदे भायर संसदीय, असंसदीय उतरावळी विशीं बरे तरेन सांगूंक शकतात. संसदीय असंसदीय उतरावळी विशीं कांय परंपरा, तत्वां, नियम आसात पूण कायद्याचे फास्केंत तीं बांदूंक नात, तोच वावर मोदीजींचें सरकार करपाचे दिकेन फुडें सरता अशें दिसूंक लागलां.
डिजिटल मिडिया जेन्ना धांवता, रात दीस खरें फट पळेनासतना खबरो दिता, पयशांच्या बळार कित्याय कितें उलयता तेन्ना बंधनां हाडप सरकाराचें कर्तव्य आसा. विधानसभेचें वा संसदेचें वार्तांकन करप आनी समाजीक प्रस्न हातासप वेगळें. विधानसभेंत धा – बाराच न्हय जाल्यार पांच – सात वरां बसपाचो अणभव वेगळोच, तो वर – दोन वरां विधानसभेचें कामकाज आयकून, पळोवन येवचोना आनी ताचेवेल्यान विधानसभेंतल्या लोकप्रतिनिधींच्या वावरा विशीं प्रतिक्रिया दिवप चूक. विधानसभेचें कामकाज म्हणल्यार फकत लोकप्रतिनिधींचें सादें उलोवप न्हय जाल्यार तांच्या मनांतले लोकां विशींचे, मतदारसंघा विशींचे उमाळे आसतात. ते सांगतना असंसदीय भास वांगड्यांनी वापरली, मिडियान तेच भाशेचो उपेग केलो जाल्यार सभाघराचे हक्कभंग समिती मुखार तो विशय मांडपाचो हक्क लोकप्रतिनिधींक आसता, पूण आदीं त्या विशयाचेर सभापतींक पत्र बरोवन, निवेदन दिवन न्याय दिवपाची मागणी करपाक जाय. प्रधानमंत्री मोदीजींनी हालींच राज्यसभेर वेंचून आयिल्ल्या नव्या खासदारांक निती विशीं मार्गदर्शन केलें. संसद, विधानसभेच्या वांगड्याचे निती विशीं केन्ना तरी मोदीजी ‘मन की बात’ करतले, माध्यमांक निती म्हणल्यार कितें तें सांगतना तांणी माध्यमांचे हक्क, कर्तव्यां समजावपाची गरज आसा. माध्यमां उदेंतेच्या सुर्याक नमन करतात पूण तेच बराबर समाजमनाचो हारसो जावपाची तांक तांच्यांत नासत, तीं एकेच दिकेन धांवता आसत जाल्यार तांचीय गाडी मार्गार हाडपाचो वावर संसदेक करपाक जाय.
75 वर्सां आदले कायदे बदलतना मुळावणाक धपको लागचो ना अशी जतनाय केंद्र सरकार घेता अशें बारीकसाणेन अभ्यास केल्यार होल्मता. देशाचे पयले प्रधानमंत्री पं. जवाहरलाल नेहरू, उपरांतचे प्रधानमंत्री लाल बहादूर शास्त्री, इंदिरा गांधी आनी हेरां वांगडा राष्ट्रपिता महात्मा गांधीजी, सरदार वल्लभभाई पटेल, घटनाकार डॉ. बाबासाहेब आंबेडकर हांची याद मोदीजींक आसा हें म्हत्वाचें. कवितेंतल्यान बांगला देस झुजा वेळार इंदिराजींची तोखणाय करपी, तांकां तेंको दिवपी आदले प्रधानमंत्री अटलबिहारी वाजपेयी भाजपचेच. तांची आनी मोदीजींची निती वेगळी आसली तरी आपल्या मंत्रीमंडळ वांगड्यांचेरच न्हय जाल्यार देशांतल्या सगल्या राज्यांच्या कारभाराचेर ते नदर दवरतात, तंत्रगिन्यानाच्या उपेगान तांकां संवसारांत कितें चललां तें खिणात कळटा. पिरायेन जाण्टे जाल्ल्यांक सरकारा भायर स्वतंत्र यंत्रणांच्या वावरांत घुस्पावंक तांणी आरंभ केला आनी गोंय सरकारय तेच दिकेन वतलें अशीं चिन्नां आसात.
थीर सरकाराची दशकपुर्ती
गोंयांत भाजपाच्या स्थीर सरकाराचीं अंदूं दशकपुर्ती. योगायोगान मुखेलमंत्री डॉ. प्रमोद सावंत, आमदार विजय सरदेसाय, पर्यटनमंत्री रोहन खंवटे, आमदार मायकल लोबो, आमदार निलेश काब्राल, आमदार जेनिफर मोन्सेरात हांच्या विधानसभेर येवपाच्या राजकारणाचीं अंदूं धा वर्सां जातात. आमदार आलेक्स रेजिनाल्ड लॉरेन्स, भलायकीमंत्री विश्वजीत राणे तशेंच हेर कांय तरनाटे पंदरा वर्सां विधानसभेंत आसात. तरनाट्यांच्या भुजांचेर गोंयच्या फुडाराचें वजें आयज आसा. मुखेलमंत्री डॉ. सावंत तशे नवे पिळगेंतलेच, कुशळटायेंतल्यान फुडें वतना उत्कृश्टताय हीच तांची मोख आसची.
मेळिल्ली माहिती सत, फटी तपासप तांचें कर्तव्य. प्रादेशीकतेच्या मार्गान गेल्यार, शंबर वर्सां आदले भारतकार हेगडे देसाई हांणी दिल्लो मंत्र समाजांत, सरकारांत केळयल्यार गोंय स्वयंपूर्ण करपाचें तांचें ध्येय पुराय जातलेंच. स्वयंपूर्णते खातीर ते शेतां – भाटां कुळागरांक राखण दिवपाक पाळो दिवंक सोदतात तरीय गोंय दुदा पासून फळां भाजी आनी कड्डणच न्हय जाल्यार नाल्लां खातीर सुद्धां शेजारच्या राज्यांचेर निंबून आसात. अशा वेळार स्वतंत्र आय.आय.टी. प्रकल्प जाय काय आदले मुख्यमंत्री मनोहर पर्रीकर हांच्या विचारांतलो मुंबय आय.आय.टी. कडेन जोडिल्लो फांटो जाय, ताचो परतून अभ्यास करचो. सांग्यार केंद्रीय येवजणेंतल्यान दुदग्राम तशेंच हेर प्रकल्पाचें नियोजन आसलें ताचें कितें जालें? मोपा विमानतळ येतना दक्षीण गोंय कृषी तशेंच ल्हान उद्येगांचो, वस्त्रोद्येगाचो जिल्हो कित्याक जावचो न्हय? गवंडे, लाकूडकाम, धातूकामा वरी कुशळकायेचीं प्रशिक्षण केंद्रां गोंयांक जाय तातूंतल्यान गोंय स्वयंपूर्ण, स्वयंसिद्धच न्हय जाल्यार उत्कृश्टतायेचें घर जावपाक आदार मेळटलो.
देसांतले सुपुल्लें गोंय राज्य ल्हान, पूण म्हान व्यक्तीमत्वांचे. बांगला देस झुजाचे फोटे थंय वचून काडिल्ले, पत्रकारितेक ओंपून घेतिल्ले फोटोग्राफर अंबाजी कामत आमचे मदीं आसात. पत्रकार, पत्रकारितेक अभिमान दिसपा सारको तांचो मोलादिक वावर. त्या वावराक तांचीं घरचीं, इश्ट आयज सलाम करतात, सरकारय तांकां रोखडोच मानाचो तुरो भेटयतलें अशी आस्त आसा.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.