भांगरभूंय | प्रतिनिधी
सद्गुरू जग्गी वासुदेव हांचो ‘सेव्ह सॉयल’ कार्यावळींत उलो; गोंय सरकार- इशा फावंडेशना मदीं समजिकाय कबलात
भांगरभूंय I प्रतिनिधी
पणजी : लोकप्रीय कामांक प्राधान्य दिनासतना सरकारान फुडाराचो विचार करून दीर्घकालीन गुंतवणूक वा नियोजनाचेर भर दिवपाची गरज आसा. पांच वर्सांच्या कार्यकाळांत लोकांच्या फुडाराचो विचार करून दीर्घकालीन नियोजना खातीर लाेकांनी जनादेश दिला. ह्या जनादेशाचो आदर करून सरकारान वावर करपाक जाय, अशें आवाहन सद्गुरू जग्गी वासुदेव हांणी केलें.
‘सेव्ह सॉयल’ कार्यावळी खाला गोंय सरकार आनी ईशा फावंडेशन संस्थे मदीं समजिकाय कबलात जाली. मातयेचो सांबाळ करपा खातीर परंपरीक पद्दतीन शेती करपाचो सल्लो दितना सद्गुरू जग्गी वासुदेव हांणी जिविता विशीं आनी अन्न सुरक्षे विशीं मोलाचें विचार मांडलें.
ताळगांवच्या डॉ. श्यामाप्रसाद मुखर्जी स्टेडियमाचेर जाल्ले कार्यावळीक मुख्यमंत्री डॉ. प्रमोद सावंंत,
केंद्रीय पर्यटन राज्य मंत्री श्रीपाद नायक, शेतकी मंत्री रवी नायक, उदका पुरवण खात्याचे मंत्री सुभाष शिरोडकार, भौशीक बांदकाम खात्याचे मंत्री निलेश काब्राल, पर्यटन मंत्री रोहन खंवटे, समाज कल्याण खात्याचे मंत्री सुभाष फळदेसाय कार्यावळीक हाजीर आशिल्ले. तशेंच राज्याच्या सगल्या वाठारांतल्या लोकांची कार्यावळीक हाजेरी आशिल्ली.
आनीक वीस वर्सांनी म्हणल्यार 2045 मेरेन 40 टक्के लोकांक तीन दिसां खातीर जेवण मेळचें ना. सध्या 8 वर्सां पिराये सकयल्या 3.6 लाख भुरग्यांक कुपोशणाक लागून मरण येता. हाचे पयलीं अन्नाच्या उणावाक लागून दुकळ पडिल्लो. पृथ्वीची भलायकी ही पर्यावरणाचेर निंबून आसा. पर्यावरणांत मातयेचो वांटो व्हड आसा. उदक, झाडां, धान्य, पर्यावरण, भाजयो सगले मातयेचेर निंबून आसात. मातयेचेर हेर सगल्या प्राण्यांचे जिवीत निंबून आसा. हाका लागून मातयेच्या जतनायेक सर्वोच्च प्राधान्य दिवपाक जाय, अशें सद्गुरू जग्गी वासुदेव हांणी
सांगलें.
सद्गुरू जग्गी वासुदेव हांणी मोटारसायकली वयल्यान 26 देशांनी 30 हजार किमि. प्रवास केला. 100 दिसांचो प्रवास करून तांणी मातये विशीं जागृताय केल्या.
राज्यांत 33 टक्के रान वाठार आसा. हातूंत 66 टक्के झाडां आसात. राज्यांत मातयेचें परिक्षण करपाची प्रक्रिया सुरू जाल्या, अशेंय तांणी सांगलेंं. कार्यावळी पयलीं सांस्कृतीक कार्यावळी जाल्यो.
मनशान आत्मकेंद्रींत जायनासतना हेरांचोय विचार करचोः सद्गुरू
मनीस हो आत्मकेंद्रीत विचार करता. दर एकल्यान आपणा सयत हेरांचोय विचार करपाक जाय. आवयच्या पोटांत जें भुरगें आसता, ताका लेगीत अन्नाची गरज आसता. 2045 – 50 मेरेन अन्नाचो उणाव निर्माण जावपाची भिरांत आसा. अन्न धान्य तशेंच सैमा खातीर मातयेची गरज आसा. मातयेची सुपीकपणा जपपाच्या हेतान ‘सेव्ह सॉयल’ मोहीम सुरू जाल्या. 80 देशांनी कबलातीचेर सयो केल्यात. चीनान मातयेचें धोरण जाहीर केलां. अमेरिका, जर्मनी ह्या देशांनी व्हड अर्थीक तजवीज ‘सेव्ह सॉयल’ मोहिमे खातीर केल्या. पर्यावरण, अन्न तयार जावपी घटक हेर प्राण्यांचे जिवीत मातयेचेर निंबून आसा, अशें तांणी सांगलें.
सैद्रीय शेती खातीर 16 गांवांची निवड : मुख्यमंत्री
राज्यांत 16 गांवांनी सैमीक पद्दतीन शेती जातली. रासायनीक वा साऱ्यांचो वापर जायनासतना ह्या गांवांनी सेंद्रीय शेतीचें प्रयोग जातलें, अशें मुख्यमंत्री डॉ. प्रमोद सावंत हांणी सांगलें. ते भायर सगल्या शेतकारांक किसान क्रेडीट कार्ड तशेंच ‘सॉयल हॅल्थ कार्ड’ बेगिनूच दितले. किसान क्रेडीट कार्ड तशेंच ‘सॉयल हॅल्थ कार्ड’ राज्यांतल्या 100 टक्के शेतकारांक दिवपाचें उद्दिश्ट आसा. उदका पुरवण खातें 175 तळ्यांचें पुनरूज्जीवन करतलें. पोरणें गोंया शेतकी म्हाविद्यालय स्थापन करपाची प्रक्रिया सुरू जाल्या, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
