भांगरभूंय | प्रतिनिधी
विद्यार्थी हे आमच्या देशाचे फुडाराचे खांबे. हे भावी पिळगेचेरुच आमच्या देशाची इमारत उबी रावतली. देखून विद्यार्थी सर्वार्थान तंदुरुस्त आसतले, हाचे कडेन पालकांनी, शिक्षकांनी आनी समाजानूय लक्ष दिवपाची गरज आसा. हे खांबे वेरोवपाक दिवंक जायना. दर 20- 25 वर्सांनी सरभोंवतणची परिस्थिती बदलता. कल्पना पसून करूंक नाशिल्ली, अशे बदल जातात. खास करून समाजाचेर थेट प्रभाव घालपी विज्ञान, तंत्रज्ञानाच्या मळार. विद्यार्थ्यांची मानसिकतायूय बदलता. गोंयांतले आदले विद्यार्थी आनी आयचे विद्यार्थी हातूंत जमीन- आसमानाचो फरक आसा. तज्ञ न्हय, तर पिरायेची पन्नाशी, साठी हुपिल्ल्या सामान्य मनशाक पसून हो बदल जाणवतलो. तेन्नाचे विद्यार्थी हुशार आशिल्ले, आयजूय आसात. तेन्नाय समस्या आशिल्ल्यो. आयजूय आसात. फुडाराकूय आसतल्यो. आदल्या तेंपार गरिबी ही सगल्यांत व्हडली अडचण विद्यार्थ्यां मुखार पांय आडवो करून उबी रावताली. आयज गोंयांत तितली गरिबी ना. सरकारूय सगले शिकचे म्हूण पयलीं परस चड सवलती दिता. सगल्या समाजांतले भुरगे उंचेलें शिक्षण घेतात मात, सगल्या भुरग्यां मुखार एक वेगळीच समस्या उबी रावल्या, ती म्हणल्यार ताण, तणाव, सर्त- सर्त- आनी सर्त!!
दरेका मळाचेर शिक्षणा खातीर बरे संस्थेंत प्रवेश मेळयतना, नोकरे खातीर खटपट करतना जिवघेणे सर्तीक सामकार वच्चें पडटा. तातूंत सादारण मानसिकतायेचो, परिस्थितींत वाडिल्लो भुरगो फाटीं पडटा. तातूंत आरक्षण आसा. भोवतेक भुरग्यांच्या शिक्षण आनी नोकरे खातीर तांच्या पालकांक लोकप्रतिनिधींचे पांय धरचेच पडटात. भुरगो 75 टक्क्यां वयर गुण घेवन पास जाल्लो आसलो तरीय. साबार ताण- तणाव, पालकांच्यो अपेक्षा आनी हेर कांय कारणांक लागून विद्यार्थी कायम तणावा खाला आसात. कांय जाणांनी आत्महत्या केल्यात. ताका लागून गोंय सरकारा वतीन दरेके शाळेंत 2013 सावन समुपदेशक नेमल्यात. ते भेट दितात आनी विद्यार्थ्यांच्यो समस्या जाणून घेतात. गोंय शिक्षण विकास म्हामंडळाच्या समुपदेशकांनी जून 2021 ते एप्रील 2022 मेरेन 2400 विद्यार्थ्यांचें समुपदेशन केलां. तातूंतल्या फक्त बाराशीं विद्यार्थ्यांक शिक्षणा विशींच्यो अडचणी आशिल्ल्यो. तर हेरांक मानसिक ताण, भलायकी….. आनी लिंगीक शोशणाच्योय समस्या !! 2018 च्या शिक्षणीक वर्सांत 12,267, तर 2019 च्या 11,815 विद्यार्थ्यांचें समुपदेशन केलां. तातूंत वागणूक आनी भावनीक समस्यांचें प्रमाण चड आसा. करियरा विशींय विद्यार्थ्यांक ताण आसा. भलायकेच्यो समस्या आसात. हाचेर जाणकारांक चड नेटान वावर करचो पडटलो. शिक्षण खात्यान तज्ञांचे मजतीन ह्या कामांत बेगीन फुडाकार घेवचो पडटलो.
काळ बदलतलोच. ताका आडावप शक्य ना. पूण, विद्यार्थ्यांच्यो समस्या पळयल्यार बदलपी काळानूच तांकां धपको दिल्ल्याचें जाणवता. बदलती जिणेशैली, कुटुंब वेवस्था, भितर एक भायर दाखोवप दुसरेंच, हाचो विद्यार्थ्यांचेर मानसिक परिणाम जाला. आपलो शेजारी म्हयन्याक तीन हजार रुपया दिवन ट्युशन घेता, म्हणटकच तो विद्यार्थी आनी पालकांचेर समाजीक, अर्थीक चेपण येता. ऐपत नासतनाय ताका शिक्षणाच्या मळाचेर उदका सारको पयसो व्हांवोवचो पडटा. स्पर्धात्मक अभ्यासक्रमूय म्हारग जाल्यात. ट्यूशन क्लासाचें फॅड खूबच वाडलां. घडये येवपी काळांत केजीचे भुरगे पसून ट्यूशन घेतले! तातूंत इंग्लिशीचें चेपण. मुलाखती, उंचेलें शिक्षण, नोकरी…. हांकां इंग्लिशी बगर दुसरो पर्याय ना, अशेंय कांय पालकांक दिसता. देखून प्रादेशिक भाशांतल्यो शाळा, सरकारी शाळा फाटीं पडपाक लागल्यात. अर्थांत हाका हेर कारणांय आसात. इंग्लीश संभाशणाचे वर्ग सुरू करीत जाल्यार कांय प्रमाणांत पालक, विद्यार्थ्यांचो हो सोंस उणो जातलो.
वयर म्हणलां ते प्रमाण, विद्यार्थी घट तर देशाची बुन्याद बळिश्ट. केंद्र सरकाराची नवी शिक्षण पद्दत तितल्या नेटान चालीक लागूंक ना. ताचेरुय विचार करचो पडटलो. आयच्या विद्यार्थ्यां मदीं एकाग्रता ना, तांकां याद उरना, बारीकश्या कारणा वयल्यान तांकां तिडक येता, साद्या कारणा वयल्यान थोडे निर्शेतात….. फुडाराक मानसीक समस्या हाताळपी विशय पांचवे यत्ते सावन शिकोवचो पडूं येता. सध्या जें कितें जाणवता, तें पळयल्यार तो दीस चड पयस ना. अशें जावप आमचें राज्य, पर्यायान देशा खातीर बऱ्याचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
