फुडल्या वर्सां पांच सुटयो जुस्त आयतारा

भांगरभूंय | प्रतिनिधी

7 सुटयो आसून नासून सारक्योच; वर्साची पयली सुटी आयतारांत विलीन

भांगरभूंय । प्रतिनिधी

पणजीः 2023 तल्यो सुटयो हालींच जाहीर जाल्यात. तातूंतल्यो 5 सुटयो जुस्त आयतारा आयल्यात. ताका लागून कर्मचारी वर्गाच्यो 5 सुटयो सप्तकी सुटयेंत गेल्यात. 5 सुटयो शुक्रारा, 4 सुटयो शेनवारा जाल्यार 7 सुटयो सोमारा आयल्यात.

जानेवारींत नव्या वर्साचे सुरवातेची 1 जानेवारीची सुटी आयतारा आयल्या. मात सरकारी कर्मचाऱ्यांक तिसऱ्या सप्तकांत सेगीत तीन दीस सुटी मेळटली. 15 जानेवारीक तिसरो शेनवार आसा. आयतारा सप्तकी आनी मकरसंक्रांतीची एकूच सुटी आसतली. जाल्यार 16 जानेवारीक सेंट जोसेफ वाझ फेस्ताची सुटी, अश्यो सेगीत तीन दीस सुटयो मेळटल्यो.

फेब्रुवारींत गुरू रवीदास जयंतीची 5 तारखेक विशेश सुटी आयतारा आसा. जाल्यार महाशिवरात्रेची सुटी 18 फेब्रुवारीक आसा. ह्या दिसा सप्तकाचो तिसरो शेनवार आसा आनी रोखडीच आयतारा शिवजयंतीची सुटी आसा. ताका लागून तिसऱ्या सप्तकांतलो शेनवार आनी आयतार ह्यो दोनूय सुटयो तेंकून आसल्यो तरीय दोनूय सुटयो तातूंत गेल्यात.

एप्रीलांत बँक कर्मचाऱ्यांक सप्तकाच्या पयल्यो शेनवाराची आनी अर्थीक वर्साचे अखेरची सुटी एकठांय आयल्या. 7 तारखेक गूड फ्रायडेची सुट आसा. हो सप्तकाचो दुसरो शुक्रार आशिल्ल्यान परतून मदीं एक दीस काम करून रोखडीच आयतारची सुटू मेळटी. 14 तारखेक डॉ. बाबासाहेब आंबेडकर जयंतीक सप्तकाचो तिसरो शुक्रार आशिल्ल्यान तिसऱ्या शेनवाराक जोडून सेगीत तीन दीस सुटयो मेळटल्यो. म्हयन्याचे 22 तारखेक चवथो शेनवार आयला. ताका लागून परतून दोन दीस सुटयो जोडून आयल्यात.

मे म्हयन्याची सुरवात सोमाराच्यान जाता. ताका लागून आयतार आनी कामगार दीस अश्यो दोन सुटयो जोडून आयल्यात. रोखडीच सप्तकाच्या पयल्या शुक्रारा बुद्ध पुनव आसा. ताका जोडून पयलो शेनवार आनी सदांची आयतारची सुटी अश्यो तीन दीस सुटयेचे मेळटले.

16 जूनाक शुक्रार. त्या दिसा सॅक्रीड हार्ट ऑफ जिझसचें फेस्त. हो सप्तकाचो तिसरो शुक्रार. ताका लागून सेगीत तीन सुटयो मेळटल्यो. परतून जुलयच्या चवथ्या शेनवारा म्हणल्यार 29 तारखेक मोहरमाची सुटी आयताराक जोडून आयल्या. 18 सप्टेंबराक म्हयन्याचो चवथो सोमार. ह्या दिसा हरतालिकेची प्रतिबंधीत सुटी आसा. तिसरो शेनवार, आयतार आनी सोमार अश्यो तीन दीस सुटयो मेळटल्यो. ऑक्टोबराच्या सुरवेकूच सोमारा गांधी जयंती आशिल्ल्यान सेगीत दोन सुटयो मेळटल्यो.

नोव्हेंबरांत दिवाळी. दिवाळीची सुटी जुस्त आयतारा आयल्या. ह्या म्हयन्याचे 24 तारखेक शुक्रार आयला. त्या दिसा गुरू तेग बहादूर शहीद दीस. ताका लागून परतून एक दीस काम करून आयतारा आनी सोमारा गुरु नानक जयंतीची सुटी मेळटली. 4 डिसेंबराक पोरणें गोंयचे सेंट झेवियराचें फेस्त. 4 तारखेक सोमार. ताका लागून पयलो शेनवार, आयतार आनी सोमार अशे तीन दीस सुटी आसतली. नातलां सोमारा आयिल्ल्यान परतून सेगीत दोन दीस सुटी मेळटली. तरी लेगीत सुमार 5 आयतार आनी 2 शेनवार अश्यो 7 सुटयो आसून नासून सारक्योच जाल्यात.