भांगरभूंय | प्रतिनिधी
पणजी: आमची कोंकणी भास सुरक्षीत दवरपा खातीर फुडले पिळगेक कोंकणी भास उलोवपाक, वाचपाक उर्बा दिवपाक जाय. कोंकणी राजभास दिसाचें म्हत्व तांणी जाणून घेवपाची गरज आसा, अशें मत कला संस्कृती संचालक सगुण वेळीप हांणी उक्तायलें.
पणजे कृष्णदास श्यामा मध्यवर्ती ग्रंथालय आनी कला संस्कृती संचालनालय गोंय हांच्या जोड पालवान संस्कृती भवनांतल्या कला दालनांत सोमारा कोंकणी राजभास दीस आनी ज्ञानपीठ पुरस्कार फावो जाल्ले साहित्यीक रवींद्र केळेकार, तशेंच साहित्य अकादमी पुरस्कार मानेली मनोहरराय सरदेसाय हांची जल्मशताब्दी अशी जोड कार्यावळ जाली. ह्या वेळार माचयेर ज्येश्ठ कवी प्रकाश नायक, लेखिका तशेंच चित्रपट निर्माती ज्योती कुंकळकार, रवींद्र केळेकार हांचे पूत गिरीश केळेकर, मनोहरराय सरदेसाय हांचे पूत सुनील सरदेसाय, ग्रंथालयाची अभिरक्षक सुलक्षा कोळमुळे, प्रशांत फडते आनी हेर मानेस्त हजर आशिल्ले.
प्रकाश नायक हांणी घटक राज्य, राजभास आनी कोकणीचो आठव्या परिशिश्ठांत आसपाव ह्या आंदोलनाची सविस्तर म्हायती सांगून तातूंत रवींद्र केळेकार आनी मनोहरराय सरदेसाय हांच्या योगदानाचो उल्लेख केलो. तांणी म्हणलें, कोंकणी राजभास जावंक नाशिल्ली जाल्यार गोंयांक घटक राज्याचो दर्जो मेळपाचो नाशिल्लो.
सुनिल सरदेसाय हांणी सांगलें, म्हजो बापूय गोंयचे मातयेंतले शब्द वापरताले. ते बुद्धीमान आशिल्ले. तांच्या काव्यांत संवेदना, सामाजिकता आसा. ते मुळांत सहृदयी मनीस आशिल्ले. नव्या बरोवप्यांक तांणी केन्नाच उणे लेखूंक ना.
गिरीश केळेकार हांणी, म्हजो बापूय फकत गुजराती सातवी शिकिल्ले. उपरांत तांकां फोंड्यां आल्मेदा विद्यालयांत घातले. थंय लक्ष्मणराव सरदेसाय आशिल्ले. तांणी रवींद्र हांकां फ्रेंच, पुर्तुगेज भाशा शिकयल्यो. मात तांकां शिक्षणाची आवड नाशिल्ली. उपरांत तांकां पीपल्स हायस्कुलांत दाखल केले. उपरांत गांधीजींच्या विचारांच्या प्रभावान ते आश्रमी जिणेंत रमले.
ह्या वेळार ज्योती कुंकळकार हांणी निर्मिती केल्ले केळेकार आनी सरदेसाय हांचे जिणेवेले म्हायतीपट दाखयले. सरिता शिरोडकार आनी नेहा खांडेकार हांणी ह्या दिग्गज साहित्यीकांची वळख करून दिली. प्रीता परब हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.