भांगरभूंय | प्रतिनिधी
संवसारीक फुटबॉल असोसिएशनान (फिफा) भारताक व्हड धपको दितना फुटबॉल म्हासंघाचेर निलंबनाची कारवाय केली. भारतीय फुटबॉल म्हासंघांत (एआयएफएफ) तिसऱ्या पक्षाचो हस्तक्षेप वाडिल्ल्यान तात्काळ निलंबनाची कारवाय केल्ल्याचें फिफान म्हणलां.
हे कारवायेक लागून भारतांत ऑक्टोबरांत नियोजीत केल्ली बायलांची 17 वर्सां पिराये सकयली संवसारीक फुटबॉल सर्त रद्द जाली.
सर्वोच्च न्यायालयान मे म्हयन्यांत भारतीय फुटबॉल म्हासंघ बरखास्त केल्लो. तशेंच खेळाचें नियोजन करपाक म्हासंघाचे घटनेंत दुरुस्ती करपा खातीर आनी फाटल्या 18 म्हयन्यां पसून प्रलंबीत आशिल्ल्यो वेंचणुको घेवपा खातीर तीन वांगड्यांची समिती तयार केल्ली.
मजगतीं, फिफा आनी आशियायी फुटबॉल म्हासंघान एएफसीचे सरचिटणीस विंडसर जॉन हांच्या फुडारपणाखाला एक पथक भारतीय फुटबॉल भागधारकांक मेळपाक धाडलां. एआयएफएफान जुलयचे अखेर मेरेन आपल्या कायद्यांत सुदारणां करची आनी 15 सप्टेंबर मेरेन वेंचणुको घेवपा खातीर धोरण तयार करचें म्हणून हें पथक आयलां.
एआयएफएफ कार्यकारी समितीचे अधिकार घेवपा खातीर प्रशासकांची समिती स्थापन करपाचो आदेश रद्द जातकच आनी एआयएफएफ प्रशासनाक दिसपट्ट्या कार्यावळींचेर परतून नियंत्रण मेळ्ळ्या उपरांत निलंबन फाटीं घेतले अशें फिफाच्या निवेदनांत म्हणलां.
म्हयन्याचे सुरवातीक, न्यायालयान तात्काळ वेंचणुको घेवपाचे आदेश दिल्ले. तीन म्हयन्यां खातीर वेंचणूक समिती अंतरीम संस्था आसतली अशें लेगीत न्यायालयान स्पश्ट केल्लें. डिसेंबर 2020त फुटबॉल म्हासंघाची वेंचणूक जावप अपेक्षीत आशिल्लें. पूण, घटणेंतल्या कांय सुदारणांक विरोध जाल्ल्यान ही वेंचणूक जाली ना.
फिफाच्या नेमां प्रमाण, वांगडी आशिल्ल्या देशांतल्या संस्थांनी कायदेशीर आनी राजकी मध्यस्ती जावंक फावना. फिफान हाचे आदीं हेर देशांतल्या कांय राष्ट्रीय संघटनांचेर ह्याच कारणाक लागून निलंबनाची कारवाय केल्या.
बायलांची अण्डर 17 सर्त मुखार धुकलपाची शक्यताय
बायलांची अण्डर 17 संवसारीक फुटबॉल सर्त 11 ते 30 ऑक्टोबर मजगतीं गोंय, भुवनेश्वर आनी मुंबय ह्या सुवातांचेर आयोजीत करपाचो प्रस्ताव आशिल्लो. पूण, हे निलंबनाचे कारवायेक लागून सर्त मुखार धुकलपाची शक्यताय आसा.
निलंबनाक प्रफुल पटेल जापसालदार?
2009त प्रफुल पटेलाक भारतीय फुटबॉल म्हासंघाचो अध्यक्ष केल्लो. 2022त ताका सर्वोच्च न्यायालयान पदा वयल्यान काडून उडयिल्लो. भारतीय खेळां संहिते प्रमाण खंयचीय व्यक्ती तीन वर्सां परस चड वेळ अध्यक्ष म्हणून पदाचेर रावपाक शकना. पूण, प्रफुल पटेल राज्य संघटणांचे मजतीन वेंचणुको घेवपाक दिना असो ताचेर आरोप आसा. तशेंच ताणे आपल्या अधिकारांचो गैरवापर केल्ल्याचो ठपको आसा. पटेलाक पदा वयल्यान काडल्या उपरांत हे विशींच्यो हालचाली सुरू जाल्ल्यो अशे लेगीत आरोप जावपाक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
